കോഴിക്കോട്: ജില്ലയിൽ കോവിഡ് നിരീക്ഷണത്തിലുള്ളത് 3203 പേർ. ജില്ലാ മെഡിക്കൽ ഓഫീസർ ഡോ. ജയശ്രീ വി ആണ് ഇക്കാര്യം വ്യക്തമാക്കിയത്. ജില്ലയിൽ പുതിയതായി 267 പേരെയാണ് നിരീക്ഷണത്തിലാക്കിയത്. ഇതുവരെ 23,070 പേർ നിരീക്ഷണം പൂർത്തിയാക്കി. ഇന്ന് വന്ന 11 പേർ ഉൾപ്പെടെ 24 പേർ മെഡിക്കൽ കോളജ് ആശുപത്രിയിൽ നിരീക്ഷണത്തിലുണ്ട്. ഒൻപത് പേരെ ഡിസ്ചാർജ്ജ് ചെയ്തു.

പുതിയതായി വന്ന 34 പേർ ഉൾപ്പെടെ ആകെ 164 പ്രവാസികളാണ് ജില്ലയിൽ നിരീക്ഷണത്തിലുള്ളത്. ഇതിൽ 75 പേർ ജില്ലാ ഭരണകൂടത്തിന്റെ കോവിഡ് കെയർ സെന്ററിലും 89 പേർ വീടുകളിലും ആണ്. വീടുകളിൽ നിരീക്ഷണത്തിലുള്ള 89 പേരിൽ 27 പേർ ഗർഭിണികളാണ്.
 
ഇന്ന് 26 സ്രവ സാംപിൾ പരിശോധനയ്ക്ക് അയച്ചിട്ടുണ്ട്. ആകെ 2411 സ്രവ സാംപിളുകൾ പരിശോധനയ്ക്ക് അയച്ചതിൽ 2273 എണ്ണത്തിന്റെ ഫലം ലഭിച്ചു. ഇതിൽ 2242 എണ്ണം നെഗറ്റീവ് ആണ്. 138 പേരുടെ പരിശോധനാ ഫലം കൂടി ലഭിക്കാനുണ്ട്.