കൊച്ചി: തിരുവിതാംകൂര്‍ ദേവസ്വം ബോര്‍ഡും തന്ത്രികുടുംബവും തമ്മിലുള്ള തര്‍ക്കത്തെത്തുടര്‍ന്ന് ശബരിമല മേല്‍ശാന്തി അഭിമുഖം മുടങ്ങി. മേല്‍ശാന്തിയെ തെരഞ്ഞെടുക്കുന്നതിനുള്ള ഇന്റര്‍വ്യൂ ബോര്‍ഡില്‍ ഉള്‍പ്പെടുത്തണമെന്ന തന്ത്രികുടുംബാംഗം കണ്ഠര് മോഹനരുടെ ആവശ്യം ബോര്‍ഡ് നിരസിച്ചതോടെയാണ് തര്‍ക്കം ഉടലെടുത്തത്.

ഇന്നു രാവിലെ പതിനൊന്നിനാണ് മേല്‍ശാന്തി അഭിമുഖം തുടങ്ങാനിരുന്നത്. എന്നാല്‍ തര്‍ക്കം മൂലം ഇത് അനിശ്ചിതമായി നീളുകയായിരുന്നു. 

മേല്‍ശാന്തിയെ തെരഞ്ഞെടുക്കുന്നതിനുള്ള ഇന്റര്‍വ്യൂ ബോര്‍ഡില്‍ ഉള്‍പ്പെടുത്തണമെന്ന് കണ്ഠര് മോഹനര് ദേവസ്വം ബോര്‍ഡിനോട് ആവശ്യപ്പെട്ടു. എന്നാല്‍ മോഹനരുടെ പേരില്‍ കേസ് ഉള്ളതിനാല്‍ ഉള്‍പ്പെടുത്താനാവില്ലെന്ന് ബോര്‍ഡ് നിലപാടെടുത്തു. കേസ് ഇല്ലെന്നാണ് മോഹനരുടെ വാദം. 

മോഹനരുടെ ആവശ്യവും തടസവാദവും ബോര്‍ഡ് ഹൈക്കോടതിയെ അറിയിച്ചിട്ടുണ്ട്. ഹൈക്കോടതി തീര്‍പ്പുകല്‍പ്പിക്കുന്നത് അനുസരിച്ചാവും മേല്‍ശാന്തി അഭിമുഖം തുടര്‍ന്നു നടക്കുക എന്നാണ് ബോര്‍ഡ് ഉദ്യോഗസ്ഥര്‍ പറയുന്നത്.