കൊച്ചി; മരട് ന​ഗരസഭയുടെ അടിയന്തിര യോ​ഗത്തിൽ വിതരണം ചെയ്ത വടയിൽ നിന്ന് പാറ്റയെ കണ്ടെത്തി. തുടർന്ന് കുടുംബശ്രീ നടത്തുന്ന വനിത ഹോട്ടൽ ഉദ്യോ​ഗസ്ഥർ പൂട്ടിച്ചു. ഇന്നലെയാണ് സംഭവമുണ്ടായത്. ന​ഗരസഭ അടിയന്തിര കൗൺസിൽ ചേർന്നപ്പോൾ അം​ഗങ്ങൾക്ക് വിതരണം ചെയ്ത സവാള വടയിലാണ് പാറ്റയെ കണ്ടത്. മുൻ ചെയർ പേഴ്സൺ കൂടിയായ സുനില സിബിക്കാണ് പാറ്റയടങ്ങിയ വട ലഭിച്ചത്.

മരട് ഫ്ലാറ്റ് പൊളിക്കൽ വിഷയവുമായി ബന്ധപ്പെട്ട് ചേർന്ന അടിയന്തിര യോ​ഗത്തിലായിരുന്നു സംഭവം. ന​ഗരസഭാ യോ​ഗത്തിൽ സെക്രട്ടറി ഹാജരാകാതിരുന്നത് സംബന്ധിച്ച് വാദപ്രതിവാദങ്ങൾ ഇരു പക്ഷത്തും കൊഴുക്കുന്നതിനിടയിലാണ് സവാള വടയിൽ പാറ്റയെ കണ്ടെത്തിയത്. സവാള മൊരിഞ്ഞതുപോലെ കണ്ടപ്പോൾ സംശയം ഉറപ്പാക്കാൻ ചികഞ്ഞുനോക്കി. മുഴുവനോടെയുള്ള പാറ്റയാണ് വടയിലുണ്ടായിരുന്നത്.

ഉടൻ തന്നെ സുനില പാറ്റ അടങ്ങിയ വട ന​ഗരസഭ ജോലിക്കാരെ ഏൽപ്പിച്ചു. തുടർന്ന് ന​ഗരസഭ ഹെൽത്ത് ഇൻസ്പെക്ടർ എത്തി പരിശോധന നടത്തി പാറ്റ തന്നെയെന്ന് ഉറപ്പിച്ചു. ന​ഗരസഭയുടെ സമീപത്തു തന്നെ കുണ്ടന്നൂർ ജംക്ഷനിൽ കുടുംബശ്രീക്കാർ നടത്തുന്ന വനിത ഹോട്ടലിൽ നിന്നുമാണ് വട വാങ്ങിയത്. കൗൺസിൽ കഴിഞ്ഞ ഉടനെ ഹെൽത്ത് ഇൻസ്പെക്ടർ എ.എക്സ് വിൽസൺ ഹോട്ടലിൽ എത്തി പരിശോധന നടത്തിയശേഷം ഹോട്ടൽ അടപ്പിച്ചു.