തിരുവനന്തപുരം: പഴങ്ങളില് നിന്നും ധാന്യങ്ങളില് നിന്നും മദ്യം ഉത്പാദിപ്പക്കാന് അനുമതി നല്കാന് മന്ത്രിസഭായോഗ തീരുമാനം.ചക്ക, കശുമാങ്ങ, വാഴപ്പഴം മുതലായവയില് നിന്നും കാര്ഷിക ഉത്പന്നങ്ങളില് നിന്നും വീര്യം കുറഞ്ഞ മദ്യം, വൈന് തുടങ്ങിയ പാനീയങ്ങള് ഉല്പാദിപ്പിക്കുന്നതിന് കേരള കാര്ഷിക സര്വകലാശാല സമര്പ്പിച്ച റിപ്പോര്ട്ട് അംഗീകരിക്കാനാണ് തീരുമാനം.
നിയമസഭാ സബ്ജക്ട് കമ്മിറ്റിയുടെ നിര്ദേശത്തിന്റെ അടിസ്ഥാനത്തിലാണ് കാര്ഷിക സര്വകലാശാല ശുപാര്ശകള് സമര്പ്പിച്ചത്. ഇതനുസരിച്ച് പഴവര്ഗ്ഗങ്ങള്, ധാന്യങ്ങള് എന്നിവയില് നിന്ന് വൈന് ഉല്പാദിപ്പിക്കുന്ന യൂണിറ്റുകള്ക്ക് അബ്കാരി നിയമങ്ങള്ക്ക് അനുസൃതമായി ലൈസന്സ് നല്കാനും തീരുമാനിച്ചു. ഇതിനു വേണ്ടി ബന്ധപ്പെട്ട ചട്ടങ്ങളില് ഭേദഗതി വരുത്തും.
മുന് കേരള ചീഫ് സെക്രട്ടറി എസ്എം വിജയാനന്ദ് ചെയര്മാനായി ആറാം സംസ്ഥാന ധനകാര്യ കമ്മീഷന് രൂപീകരിക്കാനും മന്ത്രിസഭ തീരുമാനിച്ചിട്ടുണ്ട്. പ്രാദേശിക സ്വയംഭരണ സ്ഥാപനങ്ങളുടെ സാമ്പത്തിക സ്ഥിതി അവലോകനം ചെയ്യുന്നതിനും അവയ്ക്കുള്ള അവാര്ഡു തുക നിര്ണയിക്കുന്നതിനും വരുമാന സ്രോതസ്സ് ശക്തിപ്പെടുത്തുന്നതിനും ശുപാര്ശകള് സമര്പ്പിക്കുന്നതിനാണ് കമ്മീഷന് രൂപീകരിക്കുന്നത്. തദ്ദേശസ്വയംഭരണ വകുപ്പ് അഡീഷണല് ചീഫ് സെക്രട്ടറി, ധനകാര്യ അഡീഷണല് ചീഫ് സെക്രട്ടറി എന്നിവര് കമ്മീഷനില് അംഗങ്ങളായിരിക്കും.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates