തിരുവനന്തപുരം : സിപിഎം ലോക്‌സഭാ തെരഞ്ഞെടുപ്പിനുള്ള സ്ഥാനാര്‍ത്ഥി പട്ടിക പ്രഖ്യാപിച്ചപ്പോള്‍ നിലവിലെ എംപിമാരില്‍ കാസര്‍കോട് നിന്നുള്ള പി കരുണാകരന്‍ മാത്രമാണ് ഒഴിവാക്കപ്പെട്ടത്. സിപിഎം കേന്ദ്രകമ്മിറ്റി അംഗമായ പി കരുണാകരന്‍ സിപിഎമ്മിന്റെ പാര്‍ലമെന്ററി പാര്‍ട്ടി ലീഡറുമായിരുന്നു. എന്നാല്‍ കരുണാകരനെ ഒഴിവാക്കിയതിനെ കോടിയേരി ബാലകൃഷ്ണന്‍ ന്യായീകരിച്ചു. 

കരുണാകരന്‍ മൂന്ന് തവണ എംപിയായിരുന്നിട്ടുണ്ട്. അതുകൊണ്ട് മറ്റൊരാള്‍ക്ക് അവസരം നല്‍കാന്‍ തീരുമാനിക്കുകയായിരുന്നു. മാത്രമല്ല കരുണാകരനെ പാര്‍ട്ടി സംഘടനാ സംവിധാനത്തിലേക്ക് ആവശ്യമുണ്ടെന്നും കോടിയേരി ബാലകൃഷ്ണന്‍ പറഞ്ഞു. 

എങ്കില്‍ മൂന്നു തവണ എംപിയായ എ സമ്പത്തിനെ വീണ്ടും മല്‍സരിപ്പിക്കുന്നത് എന്തുകൊണ്ടെന്ന് മാധ്യമപ്രവര്‍ത്തകര്‍ ചോദിച്ചു. സമ്പത്തിന്റെ കാര്യത്തില്‍ സാഹചര്യം വ്യത്യസ്ഥമാണ്. മാത്രമല്ല, സമ്പത്ത് തുടര്‍ച്ചയായല്ല മൂന്നുതവണ എംപിയായതെന്നും കോടിയേരി ബാലകൃഷ്ണന്‍ വ്യക്തമാക്കി.