കണ്ണൂര്‍: മാഹിയിലെ കൊലപാതകങ്ങള്‍ ഒറ്റപ്പെട്ട സംഭവം മാത്രമെന്ന് മന്ത്രി എ സി മൊയ്തീന്‍. ഉത്തരേന്ത്യയിലേതുപോലുളള ലഹളകള്‍ ഈ സര്‍ക്കാര്‍ വന്നശേഷം ഉണ്ടായിട്ടില്ല. കേരളത്തിലെ കാര്യങ്ങള്‍ മാത്രം പര്‍വതീകരിച്ചു കാണേണ്ടതില്ലെന്നും മൊയ്തീന്‍ പറഞ്ഞു.

കൊലപാതകങ്ങളില്‍ മുഖം നോക്കാതെയുളള നടപടി സര്‍ക്കാര്‍ സ്വകരിക്കും. പകപോക്കലിന്റെ സമീപനം സിപിഎമ്മിന് ഇല്ല. മന്ത്രി എ കെ ബാലന്‍ പറഞ്ഞത് പ്രതിരോധത്തിന്റെ കാര്യം മാത്രമാണെന്നും മന്ത്രി മാധ്യമങ്ങളോട് പറഞ്ഞു.

സിപിഎം ആരേയും അങ്ങോട്ടുപോയി ആക്രമിച്ചിട്ടില്ലെന്നും ഇങ്ങോട്ട് കിട്ടിയാല്‍ തിരിച്ചു കൊടുക്കുമെന്ന മന്ത്രി എ കെ ബാലന്റെ പ്രസ്താവന വിവാദമായിരുന്നു. മാഹിയിലെ രാഷ്ട്രീയ കൊലപാതകത്തെ  എ കെ ബാലന്‍ ന്യായീകരിക്കുന്നത് അപമാനകരമാണെന്ന് പ്രതിപക്ഷ നേതാവ് രമേശ് ചെന്നിത്തല വിമര്‍ശിച്ചു. കൊലപാതകം തടയലാണ് മന്ത്രിയുടെയും സര്‍ക്കാരിന്റെയും ഉത്തരവാദിത്തം. അതു മറന്നുളള പ്രാകൃത സമീപനം ശരിയല്ലെന്നും ചെന്നിത്തല പറഞ്ഞു. ഇതിന് പിന്നാലെയാണ് എ സി മൊയ്തീന്റെ പ്രതികരണം.