തിരുവനന്തപുരം: മുഖ്യമന്ത്രിയുടെ ദുരിതാശ്വാസ നിധിയിൽ നിന്നും പണമെടുത്ത് പ്രളയബാധിത മേഖലകളില്‍ ടൗണ്‍ഷിപ്പ് സ്ഥാപിക്കുന്നത് സംബന്ധിച്ച് അന്തിമ തീരുമാനം കൈക്കൊള്ളുന്നതിന്  ഇന്ന് ഉന്നതതല യോ​ഗം ചേരും. പന്ത്രണ്ട് മണിയോടെ മുഖ്യമന്ത്രിയുടെ കോൺഫറൻസ് ഹാളിലാണ് യോ​ഗം ചേരുക. 

എന്നാൽ മുഖ്യമന്ത്രിയുടെ ദുരിതാശ്വാസ ഫണ്ട് വകമാറ്റിച്ചിലവഴിക്കാനുള്ള നീക്കമാണിതെന്ന് പ്രതിപക്ഷം ആരോപിക്കുന്നു. പ്രകൃതി ദുരന്തം, അപകടങ്ങള്‍, രോഗങ്ങള്‍ തുടങ്ങിയ വിഷയങ്ങളിലാണ് സാധാരണയായി ഫണ്ട് ചിലവഴിക്കുക. മറ്റ് ആവശ്യങ്ങൾക്ക് ഈ ഫണ്ടിൽ നിന്നും പണം എടുക്കാറില്ലെന്നും പ്രതിപക്ഷം പറയുന്നു. 

പ്രളയകാലത്ത് പൊതുജനങ്ങളിൽ  നിന്നും വിവിധ സംഘടനകളിൽ നിന്നും സംഭാവനയായി ലഭിച്ച തുകയാണ് നിർമ്മാണ പ്രവർത്തനങ്ങൾക്ക് ഉപയോ​ഗിക്കാൻ നിലവിൽ തീരുമാനിച്ചിരിക്കുന്നത്. പ്രളയബാധിതർക്കും മരണപ്പെട്ടവരുടെ ആശ്രിതർക്കും നൽകിയ ശേഷം 2000 കോടി രൂപ ഇതിൽ അവശേഷിക്കുന്നുണ്ട്. ഈ തുകയാണ് ടൗൺഷിപ്പ് നിർമ്മാണത്തിന് ഉപയോ​ഗിക്കാൻ ആലോചിക്കുന്നത്. 

 ചീഫ് സെക്രട്ടറി അടക്കമുള്ള നേതാക്കൾ ഉന്നത തല യോ​ഗത്തിൽ പങ്കെടുക്കുമെന്നാണ് റിപ്പോർട്ടുകൾ. എന്നാൽ റവന്യൂമന്ത്രിക്കും ഉദ്യോ​ഗസ്ഥർക്കും യോ​ഗത്തിലേക്ക് ക്ഷണമില്ല.