തിരുവനന്തപുരം: വിരമിച്ച പൊലീസ് മേധാവി ടി.പി.സെന്‍കുമാറിന്റെ വിമര്‍ശനങ്ങള്‍ക്ക് തിരിച്ചടിയുമായി എഡിജിപി ടോമിന്‍ തച്ചങ്കരി. സേനയില്‍ നിന്നും ആനുകൂല്യങ്ങളും, സൗഭാഗ്യങ്ങളും ലഭിച്ചതിന് ശേഷം വിമര്‍ശിക്കുന്നത് ശരിയല്ലെന്ന് തച്ചങ്കരി പറഞ്ഞു.

നിയമം ഉപയോഗിക്കുന്നത് കയ്യടി കിട്ടാന്‍ വേണ്ടിയാണോ? വീട്ടില്‍ പറയേണ്ടത് വഴിയില്‍ പറയരുത്. പൊതു ചര്‍ച്ച നടത്തി പൊലീസിനെ അപകീര്‍ത്തിപ്പെടുത്തരുത്.  ഗ്യാലറിക്ക് വേണ്ടി കാര്‍ഡ് കാണിക്കരുതെന്നും തച്ചങ്കരി പറഞ്ഞു. പൊലീസ് അസോസിയേഷന്‍ സമ്മേളനത്തില്‍ സംസാരിക്കുമ്പോഴായിരുന്നു തച്ചങ്കരിയുടെ പ്രതികരണം. 

മുന്‍ വിജിലന്‍സ് ഡയറക്ടര്‍ ജേക്കബ് തോമസിനെതിരേയും തച്ചങ്കരി പരോക്ഷവിമര്‍ശനം നടത്തി. ഇപ്പോള്‍ എല്ലാവരും വിരമിക്കുന്ന സമയമാകുന്നതിനായി കാത്തിരിക്കുകയാണ്, ഓരോ പുസ്തകം എഴുതാന്‍. പുസ്തകത്തിലൂടെ ഓരോ വെളിപ്പെടുത്തല്‍ നടത്തി ശ്രദ്ധ നേടാനാണ് ശ്രമമെന്നും തച്ചങ്കരി പറഞ്ഞു.