കോട്ടയം: സപ്ലൈക്കോയിൽ നിന്നു വാങ്ങിയ മല്ലി പാക്കറ്റിൽ നിന്ന് ചത്ത എലിയെ കണ്ടെത്തി. കറുകച്ചാൽ കൂത്രപ്പള്ളി തെങ്ങോലിപ്പടി തെങ്ങുപള്ളിൽ ബിനി ജോസഫിനാണ് ഉണങ്ങിയ നിലയിൽ എലിയെ കിട്ടിയത്. സംഭവത്തിൽ ബിനി ജോസഫ് പരാതി നൽകി.

18ന് രാവിലെയാണ് ഇവർ കറുകച്ചാൽ–മണിമല റോഡിലെ സപ്ലൈകോയിൽ നിന്ന് സാധനങ്ങൾ വാങ്ങിയത്. ഇതിൽ അര കിലോയുടെ മല്ലി പാക്കറ്റിലാണ് ചത്ത എലിയെ കിട്ടിയത്.

വീട്ടിലെത്തിച്ച മല്ലി പാക്കറ്റ് പൊട്ടിച്ച് കഴുകാൻ എടുത്തപ്പോഴാണ് എലിയെ കണ്ടത്. നടപടി ആവശ്യപ്പെട്ട് താലൂക്ക് സപ്ലൈ ഓഫീസിൽ പരാതി നൽകാനാണ് ഇവരുടെ തീരുമാനം.

അതേസമയം, 40 കിലോയിൽ താഴെയുള്ള ചാക്കുകളിലായി ഇ –ടെൻഡർ പിടിക്കുന്ന സപ്ലയർ ചങ്ങനാശേരിയിലെ ഗോഡൗണിൽ എത്തിക്കുന്ന മല്ലിയാണ് കറുകച്ചാലിലെ സപ്ലൈകോയിൽ എത്തിക്കുന്നതെന്നും ഇതിൽ എത്തിയതാകാം എലിയെന്നും സപ്ലൈകോ അധികൃതർ അറിയിച്ചു.