സിഡ്‌നി: ഓസ്ട്രേലിയയിലെ ഒരു പബ്ലിക് ലൈബ്രറിയില്‍ നിന്നും എടുത്ത പുസ്തകം 150 വര്‍ഷങ്ങള്‍ക്കു ശേഷം തിരിച്ചെത്തി. ലൈബ്രറിയുടെ പഴയ നിയമപ്രകാരം ഇതിന്റെ ലേറ്റ് ഫീ (വൈകിയതിനുള്ള പിഴ) കണക്കാക്കിയാല്‍ ഏകദേശം 28,000 ഓസ്ട്രേലിയന്‍ ഡോളര്‍ (ഇന്ത്യന്‍ രൂപ 16 ലക്ഷം) വരും!

1858ല്‍ പ്രസിദ്ധീകരിച്ച 'ആന്റിക്വിറ്റീസ് ഓഫ് ഏഥന്‍സ്' എന്ന അപൂര്‍വ്വ പുസ്തകമാണ് ന്യൂ സൗത്ത് വെയില്‍സിലെ കയാമ ലൈബ്രറിയിലേക്ക് തിരിച്ചെത്തിയത്. ഒരു വീടിന്റെ നവീകരണ പ്രവൃത്തികള്‍ക്കിടെയാണ് പതിറ്റാണ്ടുകളായി അടച്ചിട്ടിരുന്ന മുറിയിലെ ചായപ്പെട്ടിയില്‍ നിന്നും പുസ്തകം കണ്ടെത്തിയത്. വര്‍ഷങ്ങളോളം അടഞ്ഞു കിടന്നതിനാല്‍ ഈര്‍പ്പം തട്ടി പുസ്തകത്തിന് ചെറിയ കേടുപാടുകള്‍ സംഭവിച്ചിട്ടുണ്ട്.

ഇത്രയും പഴക്കമുള്ള പുസ്തകം ആദ്യമായാണ് ലൈബ്രറിയിലേക്ക് തിരികെ ലഭിക്കുന്നതെന്ന് കയാമ ലൈബ്രറി മാനേജര്‍ മിഷേല്‍ ഹഡ്‌സണ്‍ പറഞ്ഞു. 1872ലാണ് കയാമ ലൈബ്രറി പ്രവര്‍ത്തനം ആരംഭിക്കുന്നത്. ലൈബ്രറിയുടെ ആദ്യകാലത്തെ 1,000 പുസ്തകങ്ങളുടെ ശേഖരത്തില്‍ 506-ാം നമ്പറായി ലിസ്റ്റ്് ചെയ്തിരുന്ന പുസ്തകമാണിത്.

റോസ് സിമ്മണ്‍സ് എന്നയാളാണ് പുസ്തകം ലൈബ്രറിയില്‍ തിരികെ ഏല്‍പ്പിച്ചത്. തന്റെ കുടുംബവീട് പുതുക്കിപ്പണിയുന്നതിനിടയിലാണ് അദ്ദേഹത്തിന് ഇത് ലഭിച്ചത്. 1870കളില്‍ ഈ വീട്ടില്‍ താമസിച്ചിരുന്ന തന്റെ മുത്തച്ഛന്റെ പിതാവ് ജോണ്‍ സിമ്മണ്‍സ് ആയിരിക്കാം ഈ പുസ്തകം ലൈബ്രറിയില്‍ നിന്നും എടുത്തതെന്ന് അദ്ദേഹം കരുതുന്നു.