സനാ: യമനില്‍ സ്‌കൂള്‍ ബസിന് നേരെയുള്ള ആക്രമണത്തില്‍ കുട്ടികളടക്കം 43 പേര്‍ മരിച്ചു. 61ഓളം പേര്‍ക്ക് പരുക്കേറ്റിട്ടുണ്ട്. സൗദി അറേബ്യ- യു.എ.ഇ സംയുക്ത സേന നടത്തിയ ആക്രമണത്തിനിടെയാണ് സ്‌കൂള്‍ ബസ് തകര്‍ന്നത്. ഹൂതി വിമതര്‍ക്കെതിരേയാണ് സംയുക്ത സേനയുടെ ആക്രമണം. 

സാദാ പ്രവിശ്യയിലെ ദഹ്യാന്‍ മാര്‍ക്കറ്റിലൂടെ പോകുകയായിരുന്നു സ്‌കൂള്‍ ബസ്. ഈ സമയത്താണ് ആക്രമണമുണ്ടായത്. വേനലവധിക്കാലത്തെ പ്രത്യേക ഖുര്‍ആന്‍ പഠനത്തിന് പോയ കുട്ടികളടക്കമുള്ളവരായിരുന്നു ബസില്‍. കൊല്ലപ്പെട്ടവരില്‍ ഭൂരിഭാഗവും പത്ത് വയസില്‍ താഴെയുള്ള കുട്ടികളാണ്.