ദുബായ്: ഏഷ്യൻ ബോക്സിങ് ചാമ്പ്യൻഷിപ്പിൽ ഇന്ത്യയുടെ പൂജ റാണിക്ക് സ്വർണം. 75 കിലോ ഗ്രാം വിഭാഗത്തിലാണ് നിലവിലെ ചാമ്പ്യൻ തന്നെയായ പൂജ നേട്ടം സ്വന്തമാക്കിയത്. ഉസ്ബെക്കിസ്ഥാന്റെ മവ്ലൂഡ മോവ്ലോണ ആയിരുന്നു പൂജയുടെ എതിരാളി. ആദ്യ റൗണ്ടിൽ വാക്ക് ഓവർ ലഭിച്ച പൂജ കൃത്യമായ ആധിപത്യത്തോടെയാണ് സ്വർണം സ്വന്തമാക്കിയത്. 

51 കിലോ ഗ്രാം വിഭാഗം ഫൈനലിൽ ആറ് തവണ ലോക ചാമ്പ്യയായ മേരി കോം പരാജയപ്പെട്ടതോ‌ടെ വെള്ളിയിലൊതുങ്ങി.  ഖസാക്കിസ്ഥാന്റെ നാസിം ക്യാസയ്ബെയോട് 2-3 എന്ന സ്കോറിലായിരുന്നു തോൽവി. ഏഷ്യൻ ബോക്സിങ് ചാമ്പ്യൻഷിപ്പിലെ മേരി കോമിന്റെ  ഏഴാം മെഡലാണിത്. 

ടൂർണമെന്റിൽ ആദ്യമായി മത്സരിക്കാനിറങ്ങിയ ലാൽബുവാസാഹി (64 കിലോ ഗ്രാം), അനുപമ (81 കിലോ ഗ്രാം) എന്നിവരും വെള്ളി നേടി.  മേരിയുടെ തോൽവി. ലാൽബുവാസാഹി ഖസാക്കിന്റെ മിലന സാഫ്രനോവയോടും അനുപമ മുൻ ലോകചാമ്പ്യയായ ഖസാക്കിസ്ഥാന്റെ ലസാറ്റ് കുങ്കെയ്ബയേവയോടുമാണ് പരാജയം സമ്മതിച്ചത്.