ദുബായ്‌: അവസാന പന്തുവരെ ആവേശം നിറഞ്ഞ ഡൽഹി-ബാംഗ്ലൂർ പോരാട്ടത്തിൽ ബാംഗ്ലൂർ റോയൽ ചലഞ്ചേഴ്‌സിന് ജയം. ഏഴുവിക്കറ്റിനാണ് ഡൽഹി ക്യാപിറ്റൽസിനെ ബാംഗ്ലൂർ തകർത്തത്. ഡൽഹി ഉയർത്തിയ 165 റൺസ് വിജയലക്ഷ്യം പിന്തുടർന്ന ബാംഗ്ലൂരിനെ അവസാന പന്തിൽ സിക്‌സടിച്ച് വിക്കറ്റ് കീപ്പർ ബാറ്റർ ശ്രീകർ ഭരതാണ് ജയത്തിലെത്തിച്ചത്. 

78 റൺസെടുത്ത ഭരതും 51 റൺസ് നേടിയ ഗ്ലെൻ മാക്‌സ്‌വെല്ലുമാണ് ബാംഗ്ലൂർ നിരയിൽ തിളങ്ങിയത്. ജയിക്കാൻ 15 റൺസ് വേണ്ടിയിരുന്ന അവസാന ഓവർ. ഡൽഹിക്കായി ആവേശ് ഖാൻ ബോളെറിഞ്ഞു. ആദ്യ പന്തിൽ മാക്‌സ്‌വെൽ ഫോറടിച്ചു. തൊട്ടടുത്ത പന്തിൽ രണ്ട് റൺസ് നേടി. മൂന്നാം പന്ത് ലെഗ് ബൈ ആയി ഒരു റൺസ് ലഭിച്ചു. നാലാം പന്തിൽ റൺസെടുക്കാൻ സാധിച്ചില്ല. ഇതോടെ അവസാന രണ്ട് പന്തിൽ എട്ടുറൺസായി വിജയലക്ഷ്യം. അഞ്ചാം പന്തിൽ നേടാനായത് രണ്ട് റൺസ് മാത്രം. ഇതോടെ അവസാന പന്തിൽ സിക്‌സടിച്ചാൽ മാത്രം ജയം എന്ന അവസ്ഥയിലെത്തി. അവസാന പന്തിൽ സിക്‌സടിച്ചുകൊണ്ട് ഭരത് ടീമിനെ വിജയതീരത്തെത്തിച്ചു. ഏഴുവിക്കറ്റിന്റെ തകർപ്പൻ ജയവുമായി ബാം​ഗ്ലൂർ തിളങ്ങി. 

52 പന്തുകളിൽ നിന്ന് 78 റൺസാണ് ഭരത് നേടിയത്. മൂന്ന് ഫോറിന്റെയും നാല് സിക്‌സിന്റെയും അകമ്പടിയോടെയാണ് ഇന്നിം​ഗ്സ്. 33 പന്തുകളിൽ നിന്ന് 51 റൺസെടുത്ത് മാക്‌സ്‌വെൽ പുറത്താവാതെ നിന്നു. വിജയിച്ചെങ്കിലും പോയന്റ് പട്ടികയിൽ നാലാം സ്ഥാനത്താണ് ബാംഗ്ലൂർ. 

എലിമിനേറ്ററിൽ കൊൽക്കത്ത നൈറ്റ് റൈഡേഴ്‌സാണ് ബാംഗ്ലൂരിന്റെ എതിരാളി. ക്വാളിഫയറിൽ ഡൽഹി ക്യാപിറ്റൽസ് ചെന്നൈ സൂപ്പർ കിങ്‌സിനെ നേരിടും.