ധാക്ക: ടെസ്റ്റ് ക്രിക്കറ്റില്‍ നിന്ന് വിരമിക്കുന്നതായി പ്രഖ്യാപിച്ച് ബംഗ്ലാദേശ് ഓള്‍റൗണ്ടര്‍ മഹ്മദുള്ള. സിംബാബ്വെക്കെതിരായ ടെസ്റ്റിന്റെ മൂന്നാം ദിനം കളി നിര്‍ത്തിയതിന് പിന്നാലെയാണ് മഹ്മദുള്ളയുടെ ഞെട്ടിക്കുന്ന തീരുമാനം.
സിംബാബ്വെക്കെതിരായ ടെസ്റ്റില്‍ ഒന്നാം ഇന്നിങ്‌സില്‍ മഹ്മദുള്ള 150 റണ്‍സ് സ്‌കോര്‍ ചെയ്തു. ഇതിന്റെ ബലത്തിലാണ് സിംബാബ്വെക്കെതിരെ 237 റണ്‍സിന്റെ ലീഡ് ബംഗ്ലാദേശ് കണ്ടെത്തിയത്. മഹ്മദുള്ളയുടെ ബംഗ്ലാദേശിന് വേണ്ടിയുള്ള 50ാം ടെസ്റ്റാണ് ഇത്.
ടെസ്റ്റ് പൂര്‍ത്തിയാവുന്നതിന് മുന്‍പ് തന്നെ വിരമിക്കല്‍ പ്രഖ്യാപിച്ച തീരുമാനം ചോദ്യം ചെയ്യുകയാണ് ബംഗ്ലാദേശ് ക്രിക്കറ്റ് ബോര്‍ഡ്. 50 ടെസ്റ്റില്‍ നിന്ന് 31.77 എന്ന ബാറ്റിങ് ശരാശരിയില്‍ 2914 റണ്‍സ് ആണ് മഹ്മദുള്ള സ്‌കോര്‍ ചെയ്തത്. 5 സെഞ്ചുറിയും 16 അര്‍ധ സെഞ്ചുറിയും 43 വിക്കറ്റും ടെസ്റ്റില്‍ മഹ്മദുള്ളയുടെ പേരിലുണ്ട്.
മഹ്മദുള്ളയുടെ കരിയര്‍ ബെസ്റ്റ് സ്‌കോറാണ് സിംബാബെക്കെതിരെ ഇപ്പോള്‍ നടന്നുകൊണ്ടിരിക്കുന്ന ടെസ്റ്റില്‍ കണ്ടെത്തിയ 150 റണ്‍സ്. വിരമിക്കാനുള്ള തീരുമാനം വൈകാരികമായ നിമിഷത്തില്‍ സ്വീകരിച്ചതാണോ അതോ വേണ്ടവിധം ആലോചനകള്‍ നടത്തിയതിന് ശേഷമാണോ എന്ന് ആരായുമെന്ന് ബംഗ്ലാദേശ് ക്രിക്കറ്റ് ബോര്‍ഡ് വ്യക്തമാക്കി.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates