കോപ്പൻഹേ​ഗൻ: ഫിൻലാൻഡിനെ എതിരില്ലാത്ത രണ്ട് ​ഗോളുകൾക്ക് ബെൽജിയം തകർക്കുകയും റഷ്യയെ 4-1ന് മുട്ടുകുത്തിക്കുകയും ചെയ്തതോടെ യൂറോ കപ്പിന്റെ ​ഗ്രൂപ്പ് ഘട്ടം കടന്ന് ഡെൻമാർക്ക്. ഫിൻലാൻഡിനേയും തകർത്തതോടെ ​മൂന്നിൽ മൂന്നും ജയിച്ച് ​ഗ്രൂപ്പ് ചാമ്പ്യന്മാരായാണ് ബെൽജിയം പ്രിക്വാർട്ടറിൽ കടന്നിരിക്കുന്നത്. 

ക്രിസ്റ്റ്യൻ എറിക്സണിന്റെ വീഴ്ചയിൽ മനം തകർന്ന് ആദ്യ കളിയിൽ ഫിൻലാൻഡിനോടും രണ്ടാമത്തേതിൽ ബെൽജിയത്തോടും ഡെൻമാർക്ക് തോൽവി സമ്മതിച്ചിരുന്നു. എന്നാൽ അവസാന ​ഗ്രൂപ്പ് ഘട്ട മത്സരത്തിൽ ഫിൻലാൻഡിനെ ബെൽജിയം തകർത്തതോടെ ഡെൻമാർക്കിന് അവസാന പതിനാറിലേക്കുള്ള വഴി തുറന്നു. 

മൂന്ന് പോയിന്റ് വീതമാണ് ഡെൻമാർക്കിനും ഫിൻലാൻഡിനും റഷ്യക്കും ഉണ്ടായിരുന്നത്. എന്നാൽ ​ഗോൾ ശരാശരിയിലെ വ്യത്യാസം ഡെൻമാർക്കിനെ തുടച്ചു.  ഫിൻലാൻഡിനെ ബെൽജിയം തകർ‌ത്തതോടെ ഡെൻമാർക്ക് ​ഗ്രൂപ്പിൽ രണ്ടാം സ്ഥാനക്കാരായി. 80ാം മിനിറ്റിൽ ക്രിസ്റ്റിയെൻസൻ, 82ാം മിനിറ്റിൽ ജോക്കിം മാലെ, 59ാം മിനിറ്റിൽ പൗൾസൻ, 38ാം മിനിറ്റിൽ ഡാംസ്​ഗാർഡ് എന്നിവരാണ് ഡെൻമാർക്കിന് വേണ്ടി ​ഗോൾ വല കുലുക്കിയത്. 

​​ഗ്രൂപ്പ് ഘട്ടത്തിലെ മൂന്നാം മത്സരത്തിലും രണ്ടാം പകുതിയിലാണ് ബെൽജിയം കളി കടുപ്പിച്ചത്. 74ാം മിനിറ്റിൽ സെൽഫ് ​ഗോളിലൂടെയാണ് ബെൽജിയം വല കുലുക്കിയത്. 81ാം മിനിറ്റിൽ ലുക്കാക്കു വല കുലുക്കുക കൂടി ചെയ്തതോടെ ബെൽജിയം ആധിപത്യത്തിന് മുൻപിൽ ഫിൻലാൻഡിന് മറുപടി ഉണ്ടായില്ല. മറ്റ് 5 ടീമുകൾ കൂടി യൂറോ കപ്പിന്റെ അടുത്ത റൗണ്ടിലേക്ക് ഇതോടെ കടന്നിട്ടുണ്ട്. സ്വിറ്റ്സർലാൻഡ്, ചെക്ക് റിപ്പബ്ലിക്, ഓസ്ട്രിയ, ഇം​ഗ്ലണ്ട്, സ്വീഡൻ എന്നീ ടീമുകളാണ് അത്. ഇതോടെ അവസാന 16 ഉറപ്പിച്ചിരിക്കുന്ന ടീമുകളാണ് ഓസ്ട്രിയ, ഇറ്റലി, വെയ്ൽസ്, നെതർലാൻഡ്, സ്വിറ്റ്സർലാൻഡ്, ചെക്ക് റിപ്പബ്ലിക്, ഇം​ഗ്ലണ്ട്, സ്വീഡൻ, ഫ്രാൻസ് എന്നിവർ.