സെഞ്ചൂറിയൻ: ഇന്ത്യക്കെതിരായ ടെസ്റ്റ് പരമ്പരയിലെ രണ്ടാം പോരാട്ടത്തിലും ദക്ഷിണാഫ്രിക്കൻ ക്യാപ്റ്റൻ ടെംബ ബവുമ കളിക്കില്ല. ഒന്നാം ടെസ്റ്റിനിടെ ബവുമ പരിക്കേറ്റ് പുറത്തായിരുന്നു. താരം ബാറ്റിങിനും ഇറങ്ങിയില്ല. അവസാന പോരിൽ ഓപ്പണർ ഡീൻ എൽ​ഗാർ ടീമിനെ നയിക്കും. 
രണ്ടാം ടെസ്റ്റോടെ അന്താരാഷ്ട്ര ക്രിക്കറ്റിൽ നിന്നു വിരമിക്കുന്ന എൽ​ഗാറിനു ക്യാപ്റ്റനായി വിരമിക്കാനുള്ള അപൂർവ നിയോ​ഗമാണ് വന്നു ചേർന്നത്. ജനുവരി മൂന്നിനാണ് രണ്ടാം ടെസ്റ്റ് ആരംഭിക്കുന്നത്.

ഒന്നാം ടെസ്റ്റിന്റെ ആദ്യ ദിനത്തിൽ തന്നെ ബവുമയ്ക്ക് പരിക്കേറ്റ് മൈതാനം വിടേണ്ടി വന്നു. തുടയ്ക്കേറ്റ പരിക്കാണ് ബവുമയ്ക്ക് വിനയായത്. ബവുമയ്ക്ക് ബാറ്റിങിനു ഇറങ്ങാൻ സാധിക്കാഞ്ഞതോടെ 84 റൺസുമായി നിന്ന മാർക്കോ ജാൻസനു സഹ ബാറ്ററില്ലാതെ ഇന്നിങ്സ് അവസാനിപ്പിക്കേണ്ടി വന്നു. 

ഒന്നാം ടെസ്റ്റിൽ തകർപ്പൻ സെഞ്ച്വറിയുമായി ഇന്ത്യയെ പ്രതിരോധിക്കാൻ എൽ​ഗാറിനു സാധിച്ചിരുന്നു. കരിയറിലെ ആദ്യ ടെസ്റ്റ് ഇരട്ട സെഞ്ച്വറിയിലേക്ക് കുതിക്കവെയാണ് എൽ​ഗാർ മടങ്ങിയത്. താരം 287 പന്തുകൾ നേരിട്ട് 28 ഫോറുകൾ സഹിതം 185 റൺസാണ് സ്വന്തമാക്കിയത്. താരത്തിന്റെ സെഞ്ച്വറി ബലത്തിൽ ദക്ഷിണാഫ്രിക്ക 408 റൺസെന്ന മികച്ച സ്കോർ പടുത്തുയർത്തി. ഇന്ത്യയെ ഇന്നിങ്സിനും 32 റൺസിനും അവർ വീഴ്ത്തുകയും ചെയ്തു.  

ഈ വാര്‍ത്ത കൂടി വായിക്കൂ 

ബ്രിജ് ഭൂഷന്റെ വീട് ഗുസ്തി ഫെഡറേഷന്‍ ഓഫീസ്! കടുത്ത എതിർപ്പുമായി കായിക മന്ത്രാലയം, ഒടുവിൽ മാറ്റി

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ