ഓക്ലന്ഡ്: ഐപിഎല്ലില് ഉഴപ്പിക്കളിച്ച ഓസീസ് താരം ഗ്ലെന് മാക്സ്വെല്ലും(Glenn Maxwell) പേസ് ബോളര് സേവ്യര് ബാര്ട്ലെറ്റും യുഎസിലെ മേജര് ലീഗ് ക്രിക്കറ്റില് പുറത്തെടുത്തത് തകര്പ്പന് പ്രകടനം. ലീഗില് എംഐ ന്യൂയോര്ക്കിന്റെ താരമായ ബാര്ട്ലെറ്റ് ട്വന്റി20യിലെ ആദ്യ അര്ധസെഞ്ചറിയുമായി തിളങ്ങിയപ്പോള്, വാഷിങ്ടന് ഫ്രീഡത്തിന്റെ നായകന് കൂടിയായ മാക്സ്വെല് തകര്പ്പന് സെഞ്ചറിയുമായി നിറഞ്ഞാടി. ഐപിഎല്ലില് ഇത്തവണ റണ്ണേഴ്സ് അപ്പായ പഞ്ചാബ് കിങ്സിലുണ്ടായിരുന്നിട്ടും ഇരുവരും താളം കണ്ടെത്താതെ നിറം മങ്ങിയ പ്രകടനമാണ് കാഴ്ചവെച്ചത്.
ലീഗില് സാന് ഫ്രാന്സിസ്കോ യുണികോണ്സിനെതിരായ മത്സരത്തിലാണ് എംഐ ന്യൂയോര്ക്കിന്റെ താരമായ ബാര്ട്ലെറ്റ് ട്വന്റി20 കരിയറിലെ തന്നെ തന്റെ ആദ്യ അര്ധസെഞ്ചറിയുമായി ടീമിന്റെ വിജയശില്പിയായയത്.
മത്സരത്തില് ആദ്യം ബാറ്റു ചെയ്ത സാന് ഫ്രാന്സിസ്കോ നിശ്ചിത 20 ഓവറില് നേടിയത് ഏഴു വിക്കറ്റ് നഷ്ടത്തില് 182 റണ്സ്. നാല് ഓവറില് 32 റണ്സ് വഴങ്ങി ഭേദപ്പെട്ട ബോളിങ് പ്രകടനം പുറത്തെടുത്ത ബാര്ട്ലെറ്റ്, പിന്നീട് 25 പന്തില് 59 റണ്സുമായി പുറത്താകാതെ നിന്ന് ടീമിനെ വിജയത്തിലുമെത്തിച്ചു. നാലു ഫോറും അഞ്ച് സിക്സുകളും ഉള്പ്പെടുന്നതാണ് താരത്തിന്റെ കന്നി ട്വന്റി20 അര്ധസെഞ്ചറി.ട്രെന്റ് ബോള്ട്ടും നവീന് ഉള് ഹഖും പൊള്ളാര്ഡും മൈക്കല് ബ്രേസ്വെലും ഉള്പ്പെടുന്ന ബോളിങ് നിരയ്ക്കെതിരെയായിരുന്നു ബാര്ട്ലെറ്റിന്റെ അര്ധസെഞ്ചറി പ്രകടനം. ഐപിഎലില് ഇത്തവണ പഞ്ചാബ് നിരയില് നാലു മത്സരങ്ങളില് അവസരം ലഭിച്ച താരമാണ് ബാര്ട്ലെറ്റ്.
ലോസ് ഏഞ്ചല്സ് നൈറ്റ് റൈഡേഴ്സിനെതിരെ വാഷിങ്ടണ് ഫ്രീഡം ടീമിന്റെ നായകനായ മാക്സവെല് തന്റെ എട്ടാമത്തെ ടി20 സെഞ്ച്വറി നേടിയാണ് ടീമിനെ വിജയതീരത്തെത്തിച്ചത്. മത്സരത്തില് ആദ്യ 15 പന്തുകളില് 11 റണ്സ് മാത്രം നേടിയ താരം, 48 പന്തില് നിന്ന് സെഞ്ച്വറി പൂര്ത്തിയാക്കി. 13 സിക്സും രണ്ട് ഫോറും താരത്തിന്റെ ഇന്നിങ്സിലുണ്ടായിരുന്നു.
മാക്സ്വെല്ലിന്റെ തകര്പ്പന് സെഞ്ച്വറിയുടെ കരുത്തില് ഫ്രീഡം 20 ഓവറില് 5 വിക്കറ്റ് നഷ്ടത്തില് 208 റണ്സ് എന്ന സ്കോര് നേടി. 12 ഓവറില് 92 ന് അഞ്ച് എന്ന നിലയിലേക്ക് തകര്ന്ന ടീമിനെയാണ് മാക്സ്വെല് വന് സ്കോറിലേക്ക് എത്തിച്ചത്. ടി20 ക്രിക്കറ്റില് എട്ടാമത്തെ സെഞ്ച്വറിയാണ് താരം പൂര്ത്തിയാക്കിയത്. ഫോര്മാറ്റില് 10,500 റണ്സ്, 170-ലധികം വിക്കറ്റുകള്, ഒന്നിലധികം ടി20 സെഞ്ച്വറികള് എന്നിവ നേടുന്ന ആദ്യ താരമെന്ന റെക്കോര്ഡും മാക്സവെല് സ്വന്തമാക്കി.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates