ടെസ്റ്റ് ചരിത്രത്തിൽ ഇന്ത്യയുടെ ഏറ്റവും ചെറിയ ടോട്ടൽ പിറന്നത് ഓസീസ് മണ്ണിൽ. 2020ൽ 36 റൺസിനു ഓൾ ഔട്ടായതാണ് നാണക്കേടിൽ മുന്നിൽ. ഇന്ത്യയുടെ ഏറ്റവും ചെറിയ മൂന്നാമത്തെ ടെസ്റ്റ് ടോട്ടൽ ന്യൂസിലൻഡിനെതിരെ കണ്ടെത്തിയ 46 റൺസ് തന്നെ. 1974ൽ ഇം​ഗ്ലണ്ടിനെതിരെ ഇന്ത്യ 42 റൺസിനു പുറത്തായതാണ് രണ്ടാം സ്ഥാനത്ത്.

37 വർഷം മുൻപാണ് ഇന്ത്യ ടെസ്റ്റിൽ സ്വന്തം മണ്ണിൽ 100 പോലും കടക്കാതെ എല്ലാവരും പുറത്താകുന്നത്. 1987ൽ വെസ്റ്റ് ഇൻഡീസിനെതിരെ ഇന്ത്യ 30.5 ഓവറിൽ 75 റൺസിനു പുറത്തായതാണ് നേരത്തെ ഇന്ത്യ 100 പോലും കടക്കാത്ത ഇന്നിങ്സ്.

ഹോം മത്സരത്തിൽ ഇതാദ്യമായി ഇന്ത്യൻ ടോട്ടൽ 50 കടന്നില്ല. ഇന്ത്യൻ മണ്ണിലെ ഇന്ത്യയുടെ ഏറ്റവും ചെറിയ ടെസ്റ്റ് ടോട്ടലായും കിവികൾക്കെതിരായ പ്രകടനം മാറി. ഇന്ത്യൻ മണ്ണിലെ ഏറ്റവും ചെറിയ ടോട്ടൽ ഇതുവരെ വിൻഡീസിനെതിരായ 75 റൺസായിരുന്നു.

1999ലും ഹോം പോരിൽ ന്യൂസിലൻഡ് ഇന്ത്യയെ 100 കടത്താതെ പിടിച്ചു നിർത്തിയിട്ടുണ്ട്. അന്നും 5 ബാറ്റർമാർ പൂജ്യത്തിനു പുറത്തായി. 83 റൺസിനാണ് ആ പോരാട്ടത്തിൽ ഇന്ത്യ ഓൾ ഔട്ടായത്.

ചരിത്രത്തിൽ മൂന്ന് ടെസ്റ്റുകളിലാണ് ഇന്ത്യൻ ടോട്ടൽ 50 കടക്കാതെ ഇരുന്നത്. മൂന്നാം സ്ഥാനത്തേക്ക് ഈ പോരാട്ടം എത്തി. ഹോം, എവേ പോരാട്ടങ്ങളിലായി ഇന്ത്യ 100 എത്തും മുൻപ് എല്ലാവരും കൂടാരം കയറിയ പോരാട്ടങ്ങൾ 27 എണ്ണം.

46- ന്യൂസിലന്‍ഡിനെതിരെ, 75- വെസ്റ്റ് ഇന്‍ഡീസിനെതിരെ, 76- ദക്ഷിണാഫ്രിക്കക്കെതിരെ, 83- ഇംഗ്ലണ്ടിനെതിരെ, 83- ന്യൂസിലന്‍ഡിനെതിരെ, 89- ന്യൂസിലന്‍ഡിനെതിരെ.