മുംബൈ: ഈ മാസം വിവാഹിതരാകുന്ന ബാഡ്മിന്റൺ ഇരട്ട ഒളിംപിക്സ് മെഡൽ ജേതാവ് പിവി സിന്ധുവും പ്രതിശ്രുത വരൻ വെങ്കട ​ദത്ത സായിക്കും ആശംസകളുമായി ക്രിക്കറ്റ് ഇതിഹാസം സച്ചിൻ ടെണ്ടുൽക്കർ. ഇരുവരും ഒന്നിച്ചെത്തി നേരിട്ട് സച്ചിനെ വിവാഹം ക്ഷണിച്ചു. ഇരുവർക്കൊപ്പമുള്ള ചിത്രം പങ്കിട്ടാണ് സച്ചിൻ ആശംസകൾ നേർന്നത്.

ഈ മാസം 22ന് ഉദയ്പുരിലാണ് വിവാഹം. ഹൈദരാബാദ് സ്വദേശിയും പോസിഡെക്സ് ടെക്നോളജീസ് എന്ന സ്ഥാപനത്തിന്റെ എക്സിക്യൂട്ടിവ് ഡയറക്ടറുമാണ് സിന്ധുവിന്റെ പ്രതിശ്രുത വരൻ വെങ്കട ദത്ത സായ്.

'ലവ്' വച്ചാണ് എല്ലായപ്പോഴും ബാഡ്മിന്റൺ സ്കോർ ആരംഭിക്കാറുള്ളത്. വെങ്കട ദത്ത സായിക്കൊപ്പമുള്ള താങ്കളുടെ സുന്ദരമായ യാത്ര ഇതേ ലവുമായി എക്കാലവും തുടരട്ടെ. നിങ്ങളുടെ ജീവിതത്തിലെ ഏറ്റവും സുപ്രധാന ദിവസത്തിന്റെ ഭാ​ഗമാകാൻ നേരിട്ടെത്തി ക്ഷണിച്ചതിനു പ്രത്യേകം നന്ദി. രണ്ട് പേർക്കും സുന്ദരമായ ഓർമകളുടെ സ്മാഷുകളും അനന്തമായ സന്തോഷ റാലികളും നിറഞ്ഞ ജീവിതം ആശംസിക്കുന്നു'- സച്ചിൻ കുറിച്ചു.

'കഷ്ടം, 50 പന്ത് തികച്ചു ബാറ്റ് ചെയ്യാന്‍ ആളില്ല, പിന്നെ എങ്ങനെ ടെസ്റ്റ് ജയിക്കും?'

സിന്ധുവിന്റെ പിതാവ് പിവി രമണയാണ് വിവാഹ കാര്യം വെളിപ്പെടുത്തിയത്. രണ്ട് കുടുംബങ്ങളും തമ്മിൽ വർഷങ്ങളായി പരിചയമുണ്ടെന്നു അദ്ദേഹം വ്യക്തമാക്കി. വിവാഹക്കാര്യം കഴിഞ്ഞ മാസമാണ് തീരുമാനമായതെന്നും രമണ പറഞ്ഞു.

കഴിഞ്ഞ ദിവസം സയ്യിദ് മോദി അന്താരാഷ്ട്ര പോരിലെ കിരീട നേട്ടത്തിലൂടെ ഇടവേളയ്ക്ക് ശേഷം താരം ഫോമിലേക്ക് മടങ്ങിയെത്തിയിരുന്നു. പിന്നാലെയാണ് വിവാഹ തീയതിയും പുറത്തു വന്നത്. ജനുവരി മുതൽ താരം മത്സര രം​ഗത്ത് സജീവമാകുന്നതിന്റെ ഒരുക്കത്തിലാണ്. അതിനാലാണ് ഈ മാസം തന്നെ വിവാ​ഹം നടത്തുന്നത്.