റായ്പുർ: സിംബാബ്‍വെക്കെതിരായ രണ്ടാം ടി20 പോരാട്ടത്തിൽ ​ഗ്രൗണ്ടിലെ മോശം പെരുമാറ്റത്തിന് ഇന്ത്യൻ വനിതാ ടീം വൈസ് ക്യാപ്റ്റൻ ഷെഫാലി വർമയ്ക്ക് ശിക്ഷ. ഐസിസി താരത്തിനു ശാസന നൽകി. സിംബാബാവെക്കെതിരായ രണ്ടാം ടി20 പോരാട്ടത്തിനിടെ ക്യാച്ച് കൈവിട്ടതിന്റെ അമർഷത്തിൽ പന്തെടുത്ത് ​ഗ്രൗണ്ടിൽ വലിച്ചെറിഞ്ഞതിനാണ് നടപടി.

ഐസിസി പെരമാറ്റ ചട്ടത്തിലെ ലെവൽ വൺ ലംഘിച്ചതായി കണ്ടെത്തിയതിനെ തുടർന്നാണ് നടപടി. അന്താരാഷ്ട്ര പോരിൽ ക്രിക്കറ്റ് ഉപകരണങ്ങളോ വസ്ത്രങ്ങളോ ​ഗ്രൗണ്ട് ഉപകരണങ്ങളോ ദുരുപയോ​ഗം ചെയ്യുന്നതു സംബന്ധിച്ച പെരുമാറ്റച്ചട്ടം താരം ലംഘിച്ചുവെന്നാണ് അച്ചടക്ക സമിതിയുടെ കണ്ടെത്തൽ. ശസാനയ്ക്കൊപ്പം ഒരു ‍ഡിമെറിറ്റ് പോയിന്റുമുണ്ട്.

സിംബാബ്‍വെ ഇന്നിങ്സിന്റെ 12ാം ഓവറിലാണ് സംഭവം. ശ്രീചരണിയുടെ പന്തിൽ മിഡ് ഓഫിൽ വച്ച് ചിപോ മു​ഗേരി തിരിപാനോ നൽകിയ ക്യാച്ച് ഷെഫാലി പാഴാക്കിയിരുന്നു. പിന്നാലെയാണ് നിരാശയോടെ പന്ത് നിലത്ത്ക്ക് വലിച്ചെറിഞ്ഞത്. താരം കുറ്റം സമ്മതിച്ചതോടെയാണ് ശിക്ഷ ശാസനയിലും ഡിമെറിറ്റ് പോയിന്റിലും ഒതുങ്ങിയത്.