മുംബൈ: താൻ കണ്ടതിൽ വെച്ച് ഏറ്റവും മികച്ച അത് ലറ്റാണ് യുവതാരം ശുഭ്മാൻ ​ഗില്ലെന്ന് ഇന്ത്യൻ ടീമിന്റെ ഫീൽഡിങ് പരിശീലകൻ ആർ ശ്രീധർ. ഉയർന്ന്, മെലിഞ്ഞ്, വേ​ഗത്തിൽ ഓടാൻ സാധിക്കുന്നതിനൊപ്പം കണ്ണുകളുടേയും കയ്യുടേയും ഏകോപനവും വരുന്നതോടെ മികച്ച അത്ലറ്റായി ​ഗിൽ മാറുന്നതായി ശ്രീധർ പറഞ്ഞു. 

ഇന്ത്യൻ റെഡ് ബോൾ ടീമിൽ ഇത് തുടരെ മൂന്നാം പരമ്പരയിലാണ് ​ഗിൽ ഇടം നേടുന്നത്. ഓസ്ട്രേലിയക്കെതിരായ ടെസ്റ്റ് പരമ്പരയിലെ മികവോടെയാണ് ​ഗിൽ ഭാവിയുടെ താരമായി വിലയിരുത്തപ്പെടുന്നത്. ലോക ടെസ്റ്റ് ചാമ്പ്യൻഷിപ്പിലും പിന്നെ വരുന്ന ഇം​ഗ്ലണ്ടിനെതിരായ ടെസ്റ്റ് പരമ്പരയിലും ​ഗില്ലിന്റെ പ്രകടനം നിർണായകമാവും.

ഇന്ത്യക്ക് മുൻപ് ഇം​ഗ്ലണ്ടിൽ എത്തുകയും അവിടെ ടെസ്റ്റ് കളിക്കുകയും ചെയ്യുന്നത് ന്യൂസിലാൻഡിന് മുൻതൂക്കം നൽകുമെന്ന് കരുതുന്നില്ലെന്നും അദ്ദേഹം പറഞ്ഞു. ​ഗെയിം ടൈം ലഭിച്ചില്ല എന്നത് ആശങ്കയാണെന്ന് എനിക്ക് തോന്നുന്നില്ല. മാനസികമായി നമ്മുടെ കളിക്കാർ ഒരുങ്ങി കഴിഞ്ഞു. ഈ ക്വാറന്റൈൻ സമയം ഫിറ്റ്നസോടെ ഇരിക്കാനാവും കളിക്കാർ ശ്രമിക്കുക. പരിക്കിന്റെ അലട്ടൽ ഇല്ലാതെ അവർക്ക് ഫൈനലിന് ഇറങ്ങാനാവും എന്നും ആർ ശ്രീധർ പറഞ്ഞു. 

ഇന്ത്യക്ക് മുൻപേ കിവീസ് സംഘം ന്യൂസിലാൻഡിലെത്തിയിരുന്നു. രണ്ട് ടെസ്റ്റുകൾ അവർ ഇവിടെ ഇം​ഗ്ലണ്ടിന് എതിരെ കളിക്കും. ഇന്നാണ് ഇന്ത്യൻ സംഘം ഇം​ഗ്ലണ്ടിലേക്ക് തിരിക്കുന്നത്. വ്യാഴാഴ്ച യുകെയിലെത്തുന്ന ഇന്ത്യൻ സംഘം 10 ദിവസം ക്വാറന്റൈനിലിരിക്കണം. ജൂൺ 18നാണ് ലോക ടെസ്റ്റ് ചാമ്പ്യൻഷിപ്പ് ഫൈനൽ.