അഹമ്മദാബാദ്: വെസ്റ്റ് ഇന്‍ഡീസിന് എതിരെ അഹമ്മദാബാദില്‍ ആദ്യ ഏകദിനത്തിനായി ഇന്ത്യ ഇറങ്ങുമ്പോള്‍ മുന്‍പിലുള്ളത് തകര്‍പ്പന്‍ നേട്ടം. ആദ്യമായി 1000 ഏകദിനം കളിക്കുന്ന ടീം എന്ന നേട്ടമാണ് ഇന്ത്യ ഇവിടെ സ്വന്തമാക്കുക. 

ഇതുവരെ ഒരു ടീമും 1000 ഏകദിനം എന്ന നേട്ടത്തിലേക്ക് എത്തിയിട്ടില്ല. 999 ഏകദിനങ്ങളില്‍ നിന്ന് 518 വിജയവും 431 തോല്‍വിയുമാണ് ഇന്ത്യയ്ക്കുള്ളത്. വിജയ ശരാശരി 54.54. ഏറ്റവും കൂടുതല്‍ ഏകദിനം കളിച്ച ടീമുകളില്‍ ഓസ്‌ട്രേലിയയാണ് ഇന്ത്യക്ക് പിന്നിലുള്ളത്. 

900ന് മുകളില്‍ ഏകദിനം കളിച്ച മറ്റൊരു ടീം പാകിസ്ഥാന്‍ മാത്രമാണ്

958 ഏകദിനമാണ് ഓസ്‌ട്രേലിയ കളിച്ചത്. അതില്‍ 581 എണ്ണത്തില്‍ ജയം പിടിച്ചപ്പോള്‍ 334 ഏകദിനങ്ങളില്‍ തോറ്റു. 900ന് മുകളില്‍ ഏകദിനം കളിച്ച മറ്റൊരു ടീം പാകിസ്ഥാന്‍ മാത്രമാണ്. 936 ഏകദിനമാണ് പാകിസ്ഥാന്‍ കളിച്ചത്. ശ്രീലങ്ക 870 ഏകദിനവും ഇംഗ്ലണ്ട് 761 ഏകദിനവും കളിച്ചു. 775 ഏകദിനം ന്യൂസിലന്‍ഡ് കളിച്ചപ്പോള്‍ 541 ഏകദിനമാണ് സിംബാബ്‌വെ കളിച്ചത്. 

ഫെബ്രുവരി ആറിനാണ് വിന്‍ഡിസിന് എതിരായ ഇന്ത്യയുടെ ഏകദിന പരമ്പര ആരംഭിക്കുന്നത്. മൂന്ന് ഏകദിനവും അഹമ്മദാബാദിലാണ്. രണ്ടാമത്തെ ഏകദിനം ഫെബ്രുവരി 9നും മൂന്നാമത്തേത് ഫെബ്രുവരി 11നും നടക്കും. ഫെബ്രുവരി 16നാണ് ട്വന്റി20 പരമ്പര ആരംഭിക്കുന്നത്.