തൃശൂർ: ഐഎം വിജയനും ജോപോൾ അഞ്ചേരിയും പാപ്പച്ചനുമടക്കം ഫുട്‌ബോള്‍ ഇതിഹാസങ്ങൾ കളിച്ചു വളര്‍ന്ന തൃശൂരിന്റെ മണ്ണില്‍ നിന്നു ഒരു ഫുട്‌ബോള്‍ ഗാനം. തൃശൂര്‍ മാജിക് എഫ്സിയുടെ ഔദ്യോഗിക പ്രമോ വിഡിയോ ഗാനം പുറത്തിറക്കി. തൃശൂരിന്റെ പൈതൃകവും ആനക്കമ്പവും താള- മേളങ്ങളുടെ ആവേശവും ചോരാതെയാണ് ഗാനം സംവിധാനം ചെയ്തിരിക്കുന്നത്.

പാറമേക്കാവ് ക്ഷേത്രവും പുത്തന്‍പള്ളിയും മാര്‍ക്കറ്റും റെയില്‍വേ സ്‌റ്റേഷനുമെല്ലാം നിമിഷാര്‍ദ്ധം കൊണ്ട് ഫുട്‌ബോള്‍ ഗ്രൗണ്ടുകളായി മാറുന്നു. തൃശൂരിന്റെ തനതായ പുലിക്കളിയും കടന്നുവരുന്നുണ്ട്. 'പൊടിപാറണ പൂരം' എന്നാണ് ഗാനത്തിന്റെ പേര്. ഇപ്പോള്‍ നടക്കുന്ന സൂപ്പര്‍ ലീഗ് കേരള രണ്ടാം സീസണില്‍ തൃശൂര്‍ എഫ്സി ക്ക് കൂടുതല്‍ ആവേശവും ഊര്‍ജ്ജവും പകരുന്ന രീതിയില്‍ ഉള്ളതാണ് ഗാനം.

സന്തോഷ് കൃഷ്ണനാണ് ഗാനത്തിന്റെ കോണ്‍സെപ്റ്റും സംവിധാനവും. വില്യം ഫ്രാന്‍സിസിന്റെ സംഗീതവും ചോക്ലി റാപ്പറുടെ വരികളും ഇരുവരുടെയും വോക്കലുകളും ചേര്‍ന്ന് രൂപപ്പെടുന്ന ഈ ദൃശ്യമികവാർന്ന പ്രമോയ്ക്ക് പ്രകാശ് വേലായുധന്റെ ഛായാഗ്രഹണവും രതീഷ് മോഹനന്റെ കൃത്യമായ എഡിറ്റിങ്ങും കൂട്ടുചേരുന്നു. 2024-ല്‍ രൂപം കൊണ്ടതാണ് തൃശൂര്‍ മാജിക് എഫ്സി.

മാജിക് ഫ്രെയിംസിന്റെ ഉടമയും പ്രമുഖ നിര്‍മാതാവുമായ ലിസ്റ്റിന്‍ സ്റ്റീഫന്റെ ഉടമസ്ഥതയില്‍ ഉള്ളതാണ് ടീം. സൂപ്പര്‍ ലീഗ് കേരളയുടെ ഭാഗമാണ് ഈ ടീം.