മുംബൈ: ന്യൂസിലന്‍ഡിനെതിരായ അവസാന ടി20 പോരാട്ടത്തിനും തിലക് വര്‍മ ഇന്ത്യന്‍ ടീമില്‍ ഉണ്ടാകില്ല. പരിക്കേറ്റ് പരമ്പരയിലെ ആദ്യ മൂന്ന് മത്സരങ്ങള്‍ നഷ്ടമായ താരം അവസാന രണ്ട് പോരാട്ടങ്ങള്‍ക്കുള്ള ടീമിലുണ്ടാകുമെന്നു നേരത്തെ ബിസിസിഐ വ്യക്തമാക്കിയിരുന്നു. എന്നാല്‍ പരിക്കേറ്റ് വിശ്രമിക്കുന്ന താരം പൂര്‍ണ ഫിറ്റ്‌നസ് വീണ്ടെടുത്തിട്ടില്ലെന്നാണ് വിവരം. താരം ലോകകപ്പിനു മുന്നോടിയായി ഇന്ത്യന്‍ ടീമിനൊപ്പം ചേരും.

തിലക് വര്‍മയുടെ പകരക്കാരനായി ശ്രേയസ് അയ്യരെയാണ് ടീമിലെടുത്തത്. താരത്തെ ആദ്യ മൂന്ന് പോരാട്ടങ്ങള്‍ക്കുള്ള ടീമിലാണ് ഉള്‍പ്പെടുത്തിയിരുന്നത്. തിലകിനു പരമ്പര നഷ്ടമാകുമെന്നു ഉറപ്പായ സാഹചര്യത്തില്‍ ശ്രേയസ് ടീമില്‍ തുടരും.

വിജയ് ഹസാരെ ട്രോഫിയില്‍ ഹൈദരാബാദിനായി കളിക്കുന്നതിനിടെയാണ് തിലകിനു പരിക്കേറ്റത്. താരത്തെ ആശുപത്രിയില്‍ പ്രവേശിപ്പിച്ചിരുന്നു. നിലവില്‍ താരം ബിസിസിഐയുടെ ദേശീയ ക്രിക്കറ്റ് അക്കാദമിയില്‍ ഫിസിക്കല്‍ ട്രെയിനിങ് അടക്കമുള്ള നടപടികളുമായി മുന്നോട്ടു പോകുകയാണ്. താരം അതിവേഗം പരിക്കില്‍ നിന്നു മുക്തനാകുന്നുവെന്നും ബിസിസിഐ വ്യക്തമാക്കി.

ഫെബ്രുവരി ഏഴിനാണ് ടി20 ലോകകപ്പ് തുടങ്ങുന്നത്. തിലക് ഫെബ്രുവരി 3നു ടീമിനൊപ്പം ചേരും. ലോകകപ്പിനു മുന്നോടിയായുള്ള പരിശീലന മത്സരങ്ങളില്‍ താരം കളിച്ചേക്കും.