മുംബൈ: അമേരിക്കന്‍ ഇതിഹാസ ബോക്‌സര്‍ മൈക്ക് ടൈസന് ചിക്കന്‍ ബിരിയാണിയും പരമ്പരാഗത ഷെര്‍വാണി വസ്ത്രങ്ങളും ഏറെയിഷ്ടപ്പെട്ടതായി സെലിബ്രിറ്റി ബോഡിഗാര്‍ഡ് ഷേര. ആയോധനകലാ മത്സരങ്ങള്‍ ഉദ്ഘാടനം ചെയ്യുന്നതിനായാണ് ടൈസന്‍ മുംബൈയില്‍ എത്തിയത്. ടൈസന്റെ ബോഡി ഗാര്‍ഡായി സേവനം ചെയ്തതിന് പിന്നാലെയാണ് ഷേര അദ്ദേഹത്തിന്റെ ഇഷ്ടത്തെക്കുറിച്ച് വെളിപ്പെടുത്തിയത്. നിലവില്‍ ബോളിവുഡ് സൂപ്പര്‍ സ്റ്റാര്‍ സല്‍മാന്‍ ഖാന്റെ ബോഡി ഗാര്‍ഡായ ഷേരയും അദ്ദേഹത്തിന്റെ ടൈഗര്‍ സെക്യൂരിറ്റി ഫോഴ്‌സുമാണ് ടൈസന്റെ സുരക്ഷാ ചുമതല ഏറ്റെടുത്തത്. 

കാര്യങ്ങള്‍ ആരുടേയും മുഖത്ത് നോക്കി പറയുന്ന സ്വഭാവക്കാരനാണ് ടൈസന്‍. പ്രചോദനാത്മകമായ വ്യക്തിത്വമുള്ള അദ്ദേഹത്തിന്റെ സാന്നിധ്യം തന്നെ വളരെ പോസിറ്റീവായാണ് മറ്റുള്ളവര്‍ക്ക് അനുഭവപ്പെടുക. ഇന്ത്യന്‍ സംസ്‌കാരം, ഭക്ഷണം, ആതിഥ്യമര്യാദ എന്നിവ അദ്ദേഹത്തെ വല്ലാതെ ആകര്‍ഷിച്ചു. പ്രത്യേകിച്ച് ചിക്കന്‍ ബിരിയാണിയും ഷെര്‍വാണി വസ്ത്രവും. 

മുംബൈക്കൊപ്പം ആഗ്രയിലും അദ്ദേഹം സന്ദര്‍ശനം നടത്തി. ധാരാവി, താജ്മഹല്‍ എന്നിവിടങ്ങളില്‍ മാത്രമേ അദ്ദേഹം സമയം ചെലവഴിച്ചുള്ളു. ഷേരയുടെ സുരക്ഷാ പ്രവര്‍ത്തനങ്ങളെ അഭിനന്ദിക്കാനും ടൈസന്‍ മറന്നില്ല.