ഐഎസ്എല്‍ അഞ്ചാം സീസണിലെ ഉദ്ഘാടന മത്സരത്തില്‍ ബ്ലാസ്‌റ്റേഴ്‌സ് ഗോളടിച്ച് തുടങ്ങി. രണ്ട് തവണ ചാമ്പ്യന്‍മാരായ എടികെയ്‌ക്കെതിരെ രണ്ട് ഗോളിനാണ് ബ്ലാസ്‌റ്റേഴ്‌സ് മുന്നിട്ട് നില്‍ക്കുന്നത്. കളിയുടെ 76 ആം മിനിറ്റില്‍ പോപ്ലാറ്റ്‌നിച്ചും 85 ആം മിനിറ്റില്‍ സ്റ്റൊജനോവിക്കുമാണ് ബ്ലാസ്‌റ്റേഴ്‌സിനായി ഗോള്‍ സ്വന്തമാക്കിയത്.

നൂറ് ശതമാനവും ബ്ലാസ്‌റ്റേഴ്‌സിനായി നല്‍കുമെന്ന് പറഞ്ഞത് കളിക്കളത്തിലും കാണിച്ചാണ് പോപ്ലാറ്റ്‌നിച്ചും സ്‌റ്റൊജനോവികും താരങ്ങളായത്. സ്ലൊവേനിയന്‍ ലീഗില്‍ പതിനാറ് ഗോളുകള്‍ അടിച്ചു കൂട്ടിയാണ് പോപ്ലാറ്റ്‌നിച്ച് വരുന്നത്. 158 കളികളില്‍ നിന്നും ഈ ഇരുപത്തിയാറുകാരന്‍ അടിച്ചു കൂട്ടിയത് 75 ഗോളുകള്‍. തന്റെ മുന്‍ ക്ലബായ ത്രിഗ്ലവിന് വേണ്ടി 51 മത്സരങ്ങളില്‍ നിന്നും പോപ്ലാറ്റ്‌നിച്ച് വല കുലുക്കിയത് 48 തവണ. 

മലയാളി താരം സഹല്‍ അബ്ദുള്‍ സമദ് കളിക്കാനിറങ്ങിയിട്ടുണ്ട്. മുന്‍ ഇംഗ്ലണ്ട് ഗോള്‍ കീപ്പര്‍ ഡേവിഡ് ജെയിംസിന്റെ പരിശീലനത്തിലാണ് കേരള ബ്ലാസ്റ്റേഴ്‌സ് ഈ ഐഎസ്എല്ലില്‍ കളിക്കാനിറങ്ങുന്നത്.