ന്യൂഡൽഹി: ഐപിൽ 13ാം സീസണിന് ഇന്ന് തുടക്കമാകുമ്പോൾ, ആദ്യ പോരാട്ടത്തിനിറങ്ങുന്ന ചെന്നൈ സൂപ്പർ കിങ്സിന് ആശംസകൾ നേർന്ന് വെറ്ററൻ താരം സുരേഷ് റെയ്ന. ട്വിറ്ററിലൂടെയാണ് റെയ്നയുടെ ആശംസ. നിലവിലെ ചാമ്പ്യൻമാരായ മുംബൈ ഇന്ത്യൻസാണ് ഇന്ന് ചെന്നൈ സൂപ്പർ കിങ്സിന്റെ എതിരാളികൾ.  

കോവിഡ് വ്യാപനത്തിന്റെ പശ്ചാത്തലത്തിൽ യുഎഇയിലേക്ക് മാറ്റിയ ഐപിഎലിനായി ചെന്നൈ സൂപ്പർ കിങ്സ് സംഘത്തിനൊപ്പം റെയ്നയും തുടക്കത്തിൽ അവിടെ എത്തിയതാണ്. എന്നാൽ, ക്വാറന്റൈൻ കാലയളവ് പൂർത്തിയാക്കിയതിനു പിന്നാലെ വ്യക്തിപരമായ കാരണങ്ങൾ ചൂണ്ടിക്കാട്ടി താരം നാട്ടിലേക്കു മടങ്ങുകയായിരുന്നു. അതിനിടെയാണ് ഇന്ന് ആദ്യ മത്സരത്തിനിറങ്ങുന്ന ടീമിന് റെയ്ന ആശംസകൾ നേർന്നത്. 

‘ചെന്നൈ സൂപ്പർ കിങ്സിന്റെ ചുണക്കുട്ടികൾക്ക് എല്ലാ വിജയവും ആശംസിക്കുന്നു. ഇന്ന് ഞാൻ നിങ്ങൾക്കൊപ്പം അവിടെ ഇല്ല എന്നത് സങ്കൽപ്പിക്കാൻ പോലും കഴിയുന്നില്ല. എങ്കിലും എന്റെ ആശംസകൾ നിങ്ങൾക്കൊപ്പമുണ്ട്. എല്ലാ ഭാവുകങ്ങളും നേരുന്നു’ – റെയ്ന കുറിച്ചു.