സിഡ്‌നി: വനിതാ ടി20 ലോകകപ്പിന്റെ ഉദ്ഘാടന പോരാട്ടത്തില്‍ ഇന്ത്യ കരുത്തരായ ഓസ്‌ട്രേലിയയെ തകര്‍ത്തപ്പോള്‍ താരമായി മാറിയത് പൂനം യാദവ് എന്ന ഇന്ത്യയുടെ ലെഗ്് സ്പിന്നറായിരുന്നു. നാല് വിക്കറ്റുകള്‍ വീഴ്ത്തി കളിയിലെ താരമായി മാറിയത് പൂനം ആയിരുന്നു. ഇന്ത്യ ഉയര്‍ത്തിയ താരതമ്യേന പ്രതിരോധിക്കാന്‍ സാധിക്കുന്ന സ്‌കോര്‍ ഓസീസിന് അപ്രാപ്യമാക്കിയത് പൂനത്തിന്റെ പന്തുകളായിരുന്നു. 

അതിനിടെ മുന്‍ ഇംഗ്ലീഷ് കൗണ്ടി താരവും ക്രിക്കറ്റ് കമന്റേറ്ററുമായ അലന്‍ വില്‍കിന്‍സിന്റെ ഒരു ട്വീറ്റ് ഇപ്പോള്‍ ശ്രദ്ധേയമായി മാറുകയാണ്. മത്സര ശേഷം മാന്‍ ഓഫ് ദി മാച്ച് പുരസ്‌കാരം സ്വീകരിക്കേണ്ടി വന്നപ്പോഴാണ് പൂനം ഈ രാത്രിയില്‍ ഏറ്റവും വലിയ ബുദ്ധിമുട്ടുകളെ നേരിട്ടതെന്ന് അലന്‍ തന്റെ ട്വിറ്ററില്‍ കുറിച്ചു. 

വെസ്റ്റിന്‍ഡീസ് ഇതിഹാസ പേസര്‍ ഇയാന്‍ ബിഷപ്പിന്റെ മുന്നില്‍ നിന്നാണ് താരം പുരസ്‌കാരം സ്വീകരിച്ചത്. ഇക്കാര്യം ചൂണ്ടിക്കാട്ടിയായിരുന്നു അലന്റെ ട്വീറ്റ്. അജാനബാഹുവായ ഇയാന്‍ ബിഷപ്പിന് മുന്നില്‍ പൂനം ഇത്തിരിക്കുഞ്ഞിനെ പോലെ തോന്നിപ്പിക്കുന്നു എന്നതായിരുന്നു അലന്റെ കമന്റിന്റെ സവിശേഷത. 

അലന് രസകരമായി തന്നെ ഇയാന്‍ ബിഷപ്പ് മറുപടി നല്‍കുന്നുണ്ട്. അസൂയ വേണ്ടെന്ന് ബിഷപ്പ് അലനോട് പറയുന്നു. തനിക്ക് ഏറ്റവും ഇഷ്ടപ്പെട്ട ലെഗ്‌സ്പിന്നറാണ് പൂനം എന്ന്  ബിഷപ്പ് മറുപടി ട്വീറ്റില്‍ വ്യക്തമാക്കി. 

ഇയാന്‍ ബിഷപ്പും പൂനവും കൂടെയുള്ള ചിത്രം എന്തായാലും ശ്രദ്ധേയമായി മാറുകയാണ്. ഇരുവരുടേയും വലിപ്പമാണ് ചിത്രത്തെ ശ്രദ്ധേയമാക്കുന്നത്.