ദോഹ: ലോക അത്‌ലറ്റിക് ചാമ്പ്യന്‍ഷിപ്പില്‍ പുരുഷന്മാരുടെ 400 മീറ്റര്‍ ഹര്‍ഡില്‍സില്‍ മലയാളി താരം എം പി ജാബീര്‍ സെമി ഫൈനലില്‍. ഒന്നാം ഹീറ്റ്‌സില്‍ മൂന്നാമതായി ഫിനിഷ് ചെയ്താണ് ജാബിര്‍ സെമിയിലേക്ക് കടന്നത്. 

49.62 സെക്കന്‍ഡില്‍ ഓടിയെത്തിയാണ് ജാബിര്‍ സെമി ഉറപ്പിച്ചത്. ഈ ഇനത്തില്‍ 49.13 സെക്കന്റാണ് ജാബിറിന്റെ മികച്ച സമയം. നോര്‍വേയുടെ കേസ്റ്റണ്‍ വാര്‍ഹോമാണ് 49.27 സെക്കന്റില്‍ ഓടിയെത്തി ഇവിടെ ഒന്നാമതായത്. ഓരോ ഹീറ്റ്‌സില്‍ നിന്നും നാല് പേര്‍ വീതവും, മികച്ച നാല് അഞ്ചാം സ്ഥാനക്കാരുമാണ് സെമിയിലെത്തുക. ആറ് ഹീറ്റ്‌സുകളിലായാണ് പ്രാഥമിക ഘട്ടം. 

400 മീറ്റര്‍ ഹര്‍ഡിള്‍സില്‍ ഇന്ത്യയുടെ മറ്റൊരു പ്രതീക്ഷയായിരുന്ന ധരുണ്‍ അയ്യസാമിക്ക് മികവ് കാട്ടാനായില്ല. അവസാന ഹര്‍ഡിലില്‍ പരാജയപ്പെട്ട് ദേശീയ റെക്കോര്‍ഡ് ജേതാവിന് പുറത്തേക്ക് പോവേണ്ടി വന്നു. 50.55 സെക്കന്റില്‍ ഓടിയെത്താനെ ധരുണിനായുള്ളു. ലോങ് ജംബില്‍ എം ശ്രീശങ്കര്‍ പുറത്തായതും ഇന്ത്യയ്ക്ക് തിരിച്ചടിയായിരുന്നു.