ഇന്നത്തെ കാലത്ത് ഫണ്ട് മാനേജ്മെന്റ് എന്നത് വെറുമൊരു പണം സമ്പാദ്യം മാത്രമല്ല. സാങ്കേതികവിദ്യയുടെ പുരോഗതിയും പുതിയ നിക്ഷേപ മാര്ഗ്ഗങ്ങളുടെ വരവും കാരണം പണം കൈകാര്യം ചെയ്യുന്നത് ഇപ്പോള് മുന്പത്തേക്കാള് ഏറെ വിശാലമായിരിക്കുകയാണ്. സാമ്പത്തിക കുറ്റകൃത്യങ്ങളില് നിന്ന് പ്രധാനപ്പെട്ട രേഖകള്, പണമിടപാട് വിവരങ്ങള്, നികുതി സംബന്ധമായ വിവരങ്ങള്, ഐഡന്റിറ്റി വിവരങ്ങള് എന്നിവ സുരക്ഷിതമായി സൂക്ഷിക്കുക എന്നതും പണം കൈകാര്യം ചെയ്യുന്നതിന്റെ ഭാഗമാണ്. സാമ്പത്തിക കാര്യങ്ങള് കൃത്യമായി ക്രമീകരിക്കാനും വിവരങ്ങള് അറിയാനും സഹായിക്കുന്ന നിരവധി ഔദ്യോഗിക മൊബൈല് ആപ്ലിക്കേഷനുകള് ഇന്ത്യാ ഗവണ്മെന്റ് അവതരിപ്പിച്ചിട്ടുണ്ട്.
അത്യാവശ്യ രേഖകള് സുരക്ഷിതമായി സൂക്ഷിക്കുന്നത് മുതല് രഹസ്യ വിവരങ്ങള് സംരക്ഷിക്കുന്നതിനും ഡിജിറ്റല് പേയ്മെന്റുകള് നടത്തുന്നതിനും പെന്ഷന് അല്ലെങ്കില് ഇപിഎഫ് സേവനങ്ങള് ലഭ്യമാക്കുന്നതിനും വരെ ഈ ആപ്ലിക്കേഷനുകള് സഹായിക്കുന്നു. ഈ ആപ്ലിക്കേഷനുകളെല്ലാം ഗൂഗിള് പ്ലേ സ്റ്റോറില് നിന്നും ആപ്പിള് ആപ്പ് സ്റ്റോറില് നിന്നും ഡൗണ്ലോഡ് ചെയ്യാവുന്നതാണ്. ഈ ആപ്ലിക്കേഷനുകളെക്കുറിച്ചും അവയുടെ പ്രധാന സവിശേഷതകളെക്കുറിച്ചും അറിയാം.
ഡിജിലോക്കര് :
പ്രധാനപ്പെട്ട സാമ്പത്തിക, ഐഡന്റിറ്റി രേഖകള് സുരക്ഷിതമായി സൂക്ഷിക്കുന്നു. ഡിജിറ്റല് ആധാര്, പാന്, ഡ്രൈവിങ് ലൈസന്സ്, ഇന്ഷുറന്സ് പേപ്പറുകള്, വിദ്യാഭ്യാസ സര്ട്ടിഫിക്കറ്റുകള്, നിയമപരമായി അംഗീകരിക്കപ്പെട്ട ഡിജിറ്റല് രേഖകള്, പേപ്പര്രഹിത പരിശോധന എന്നി സേവനങ്ങള് ലഭ്യമാക്കുന്നു.
ഉമാങ്:
നൂറുകണക്കിന് സര്ക്കാര് സേവനങ്ങള്ക്കുള്ള ഒറ്റത്തവണ ഗേറ്റ്വേ.ഒരൊറ്റ ആപ്പില് നിന്ന് EPFO, പെന്ഷന് സേവനങ്ങള്, പാന്, യൂട്ടിലിറ്റി ബില് പേയ്മെന്റുകള്, ഗ്യാസ് ബുക്കിങ്, പാസ്പോര്ട്ട് സേവനങ്ങള്, വിവിധ സംസ്ഥാന സര്ക്കാര് പദ്ധതികള് എന്നിവ ലഭ്യമാക്കുന്നു.
ഭീം:
സുരക്ഷിതവും ലളിതവുമായ ഡിജിറ്റല് പേയ്മെന്റുകള് നടത്താന് സഹായിക്കുന്നു. ലിങ്ക് ചെയ്തിരിക്കുന്ന ബാങ്ക് അക്കൗണ്ടുകളില് നിന്ന് നേരിട്ട് തല്ക്ഷണ ബാങ്ക് ട്രാന്സ്ഫറുകള്, ക്യുആര് കോഡ് പേയ്മെന്റുകള്, ബില് പേയ്മെന്റുകള്, പണം ആവശ്യപ്പെടല് എന്നിവയ്ക്കുള്ള ഔദ്യോഗിക യുപിഐ ആപ്പ് ആണിത്.
എം-ആധാര്:
ഡിജിറ്റല് ഐഡന്റിറ്റി എപ്പോഴും ലഭ്യമാക്കുന്നു. ആധാര് ഡിജിറ്റലായി കൈവശം വെയ്ക്കുക, വെര്ച്വല് ഐഡി ജനറേറ്റ് ചെയ്യുക, ബയോമെട്രിക്സ് ലോക്ക്/അണ്ലോക്ക് ചെയ്യുക, ആവശ്യമുള്ളപ്പോഴെല്ലാം ആധാര് വിവരങ്ങള് സുരക്ഷിതമായി പങ്കിടുക എന്നി സേവനങ്ങള്ക്ക് ഇത് സഹായകമാണ്.
എം-പരിവാഹന് :
അവശ്യ വാഹന രേഖകള് ഡിജിറ്റലായി സൂക്ഷിക്കുന്നു. ഫിസിക്കല് കോപ്പികള് കൈവശം വെയ്ക്കാതെ തന്നെ ഡിജിറ്റല് ഡ്രൈവിംഗ് ലൈസന്സ് , രജിസ്ട്രേഷന് സര്ട്ടിഫിക്കറ്റ് , വാഹന വിവരങ്ങള്, ട്രാഫിക് സംബന്ധമായ സേവനങ്ങള് എന്നിവ ലഭ്യമാക്കുന്നു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
