ന്യൂഡല്ഹി: ഫാസ് ടാഗിനായി പാലിക്കേണ്ട നോ യുവര് വെഹിക്കിള് (കെവൈവി) പ്രക്രിയ നിര്ത്തലാക്കാന് നാഷണല് ഹൈവേ അതോറിറ്റി തീരുമാനിച്ചത് ഇന്ന് പ്രാബല്യത്തില്. ഫെബ്രുവരി 1 മുതല്, ആക്ടിവേറ്റ് ചെയ്ത ഫാസ്ടാഗുകള്ക്ക് അധിക കെവൈസി പരിശോധന ആവശ്യമില്ല.
അതേസമയം പരാതി, ദുരുപയോഗം, പൊരുത്തക്കേടുകള്, അയഞ്ഞ ടാഗുകള് എന്നിവ നിലനില്ക്കുന്നപക്ഷം ഫാസ്ടാഗ് പുന: പരിശോധനയ്ക്ക് വിധേയമാക്കും. പുതുക്കിയ സംവിധാനത്തില് വാഹന വിശദാംശങ്ങള് പരിശോധിക്കേണ്ട ഉത്തരവാദിത്തം പൂര്ണ്ണമായും ബാങ്കുകള്ക്കാണ്.
ബാങ്കുകള് വാഹന പരിശോധന നടത്തുകയും വിശദാശംങ്ങള് ഡാറ്റ ബേസുമായി ഒത്തുനോക്കുകയും ചെയ്യും. ഓണ്ലൈനായി വാങ്ങിയ ഫാസ്ടാഗുകള്ക്കും ഈ പ്രക്രിയ ബാധകമാണ്. ആവര്ത്തിച്ചുള്ള കെവൈവി പരിശോധനകള് ഡോക്യുമെന്റ് അപ്ലോഡുകള്, വൈകിയ സ്ഥിരീകരണം, ടോള് പ്ലാസകളിലെ കാത്തിരിപ്പ് എന്നിവയ്ക്ക് കാരണമായിരുന്നു. തുടര്ന്നാണ് നടപടി.
സാധുവായ രേഖകള് ഉണ്ടായിരുന്നിട്ടും ഫാസ്ടാഗ് പ്രവര്ത്തനക്ഷമമാക്കിയതിനുശേഷവും കെവൈവി ആവശ്യകതകള് കാരണം അസൗകര്യങ്ങളും കാലതാമസവും നേരിട്ടിരുന്ന ലക്ഷക്കണക്കിന് സാധാരണ റോഡ് ഉപയോക്താക്കള്ക്ക് ഈ പരിഷ്കരണം ഗണ്യമായ ആശ്വാസം നല്കുമെന്ന് കേന്ദ്ര സര്ക്കാര് ഔദ്യോഗിക പ്രസ്താവനയില് പറഞ്ഞു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
