ടേം ഇന്ഷുറന്സ് പ്രീമിയം അടയ്ക്കാന് മറന്നോ? പ്രീമിയം മുടങ്ങിയ ഉടന് തന്നെ പോളിസി റദ്ദാകുകയോ കുടുംബത്തിന്റെ സാമ്പത്തിക സുരക്ഷിതത്വം നഷ്ടപ്പെടുകയോ ചെയ്യില്ല. പ്രീമിയം മുടങ്ങുന്നത് ഒഴിവാക്കാന് ബാങ്ക് വഴി ഓട്ടോമാറ്റിക് പേയ്മെന്റ് സംവിധാനങ്ങള് സജ്ജമാക്കുന്നതും അടിയന്തര സാഹചര്യങ്ങള്ക്കായി ഒരു ബഫര് ഫണ്ട് സൂക്ഷിക്കുന്നതും ഉചിതമാണ്. ഇതുമായി ബന്ധപ്പെട്ട പ്രധാന വ്യവസ്ഥകളും നിബന്ധനകളും എന്തൊക്കെയാണെന്ന് പരിശോധിക്കാം.
ഗ്രേസ് പീരിയഡ്
പ്രീമിയം അടയ്ക്കേണ്ട തീയതി കഴിഞ്ഞാലും ഇന്ഷുറന്സ് പരിരക്ഷ നിലനിര്ത്താനായി കമ്പനികള് നല്കുന്ന അധിക സമയമാണ് ഗ്രേസ് പീരിയഡ് . മാസത്തിലൊരിക്കല് പ്രീമിയം അടയ്ക്കുന്നവര്ക്ക് 15 ദിവസവും, മൂന്ന് മാസം, ആറു മാസം അല്ലെങ്കില് വര്ഷത്തിലൊരിക്കല് അടയ്ക്കുന്നവര്ക്ക് 30 ദിവസവുമാണ് സാധാരണയായി ലഭിക്കുന്ന ഗ്രേസ് പീരിയഡ്. ഈ കാലയളവില് പോളിസി സജീവമായി തുടരുകയും ഇന്ഷുറന്സ് പരിരക്ഷ ലഭ്യമാവുകയും ചെയ്യും. ഗ്രേസ് പീരിയഡിനിടയില് പോളിസി ഉടമ മരിച്ചാല്, നോമിനിക്ക് ഡെത്ത് ബെനഫിറ്റ് ലഭിക്കും. എന്നാല് അടയ്ക്കാനുള്ള പ്രീമിയം തുക ആനുകൂല്യത്തില് നിന്ന് കുറയ്ക്കുന്നതാണ്.
പോളിസി ലാപ്സ്
ഗ്രേസ് പീരിയഡ് കഴിഞ്ഞിട്ടും പ്രീമിയം അടച്ചില്ലെങ്കില് പോളിസി 'ലാപ്സ്' ആകുന്നു. ഇതോടെ ലൈഫ് കവര് അവസാനിക്കുകയും ക്ലെയിമുകള് നല്കാന് ഇന്ഷുറന്സ് കമ്പനി ബാധ്യസ്ഥരല്ലാതാവുകയും ചെയ്യുന്നു. എന്നാല് ലാപ്സ് എന്നത് പോളിസി റദ്ദാക്കലല്ല, മറിച്ച് കരാര് താല്ക്കാലികമായി നിര്ത്തിവെക്കലാണ്. ഇത് പുനരുജ്ജീവിപ്പിക്കാന് സാധിക്കും.
പോളിസി പുനരുജ്ജീവിപ്പിക്കല്
കുടിശ്ശിക വന്ന ആദ്യ തീയതി മുതല് ഏകദേശം അഞ്ച് വര്ഷത്തിനുള്ളില് ലാപ്സ് ആയ പോളിസി പുനരുജ്ജീവിപ്പിക്കാന് സാധിക്കും. ഇതിനായി കുടിശ്ശികയുള്ള പ്രീമിയത്തോടൊപ്പം പലിശയും (ഏകദേശം 8-10%) അടയ്ക്കേണ്ടി വരും. പോളിസി ഉടമയുടെ ആരോഗ്യനില തെളിയിക്കുന്ന രേഖകളോ മെഡിക്കല് പരിശോധനയോ കമ്പനി ആവശ്യപ്പെട്ടേക്കാം. പുനരുജ്ജീവിപ്പിക്കുമ്പോള് വെയ്റ്റിംഗ് പീരിയഡ്, സൂയിസൈഡ് എക്സ്ക്ലൂഷന് തുടങ്ങിയ നിബന്ധനകള് വീണ്ടും ആരംഭിക്കുമെന്നത് ശ്രദ്ധിക്കേണ്ടതാണ്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
