യുപിഐ ഇടപാടുകള്‍, എടിഎം പിന്‍വലിക്കല്‍...; ഇന്നുമുതല്‍ നിരവധി മാറ്റങ്ങള്‍

ന്യൂഡല്‍ഹി: ജൂണ്‍ 1 മുതല്‍ ഉപഭോക്താക്കളെയും ബിസിനസുകളെയും ബാധിക്കുന്ന നിരവധി സാമ്പത്തിക മാറ്റങ്ങളാണ് പ്രാബല്യത്തില്‍ വന്നിരിക്കുന്നത്. യുപിഐ ഇടപാടുകള്‍ക്കുള്ള സുരക്ഷാ മാനദണ്ഡങ്ങള്‍, എടിഎം പിന്‍വലിക്കല്‍ വ്യവസ്ഥകളിലെ മാറ്റങ്ങള്‍, നികുതിയുമായി ബന്ധപ്പെട്ട സമയപരിധികള്‍ എന്നിവ ഇതില്‍ ഉള്‍പ്പെടുന്നു.

യുപിഐ ഇടപാടുകളുമായി ബന്ധപ്പെട്ടതാണ് ഇതിലെ പ്രധാന മാറ്റം. ഉയര്‍ന്ന തുകയുടെ ഇടപാടുകള്‍ക്കായി അധിക സുരക്ഷാ സംവിധാനങ്ങള്‍ ഏര്‍പ്പെടുത്തുമെന്നാണ് പ്രതീക്ഷിക്കുന്നത്. പുതിയ മാനദണ്ഡ പ്രകാരം പേയ്മെന്റ് പ്ലാറ്റ്ഫോമുകളിലെ സാധാരണ പിന്‍ അടിസ്ഥാനമാക്കിയുള്ള വെരിഫിക്കേഷന് പുറമെ, വലിയ തുകയുടെ ഇടപാടുകള്‍ക്ക് കൂടുതല്‍ സുരക്ഷാ സംവിധാനങ്ങള്‍ ആവശ്യമായി വന്നേക്കാം.

ഉപയോഗിക്കുന്ന ആപ്പിനെയും ഇടപാടിന്റെ സ്വഭാവത്തെയും ആശ്രയിച്ച്, വിരലടയാളം (fingerprint), ഫേഷ്യല്‍ റെക്കഗ്‌നിഷന്‍ (facial recognition) അല്ലെങ്കില്‍ ഫോണിലെ മറ്റ് സുരക്ഷാ സംവിധാനങ്ങള്‍ എന്നിവയിലൂടെ ഇടപാട് സ്ഥിരീകരിക്കാന്‍ ഉപയോക്താക്കളോട് ആവശ്യപ്പെട്ടേക്കാം. അംഗീകാരമില്ലാത്ത ഇടപാടുകള്‍ കുറയ്ക്കുന്നതിനും മോഷ്ടിച്ച വിവരങ്ങള്‍ ഉപയോഗിച്ച് തട്ടിപ്പുകാര്‍ പണം തട്ടിയെടുക്കുന്നത് തടയുന്നതിനും വേണ്ടിയാണ് ഈ നടപടി. തട്ടിപ്പുകള്‍ തടയുന്നതിനുള്ള വിപുലമായ ശ്രമങ്ങളുടെ ഭാഗമായി ഗൂഗിള്‍ പേ, ഫോണ്‍പേ, പേടിഎം തുടങ്ങിയ പ്രമുഖ യുപിഐ ആപ്പുകള്‍ ഈ അധിക സുരക്ഷാ സംവിധാനങ്ങള്‍ ഉള്‍പ്പെടുത്തുമെന്നാണ് പ്രതീക്ഷിക്കുന്നത്.

എടിഎം പിന്‍വലിക്കല്‍

മറ്റൊരു പ്രധാന മാറ്റം എടിഎം പിന്‍വലിക്കലുകളിലാണ്. യുപിഐ അടിസ്ഥാനമാക്കിയുള്ള കാര്‍ഡ്‌ലെസ് പണം പിന്‍വലിക്കലുകള്‍ ഇനി മുതല്‍ ബാങ്കുകളുടെ പ്രതിമാസ സൗജന്യ പിന്‍വലിക്കല്‍ പരിധിയില്‍ ഉള്‍പ്പെടുത്തും. അതായത്, സൗജന്യ ഇടപാട് പരിധി കവിയുന്ന ഉപഭോക്താക്കളില്‍ നിന്ന് അധിക നിരക്കുകള്‍ ഈടാക്കാം.

നികുതിദായകര്‍ക്ക് ജൂണ്‍ 15 വളരെ പ്രധാനപ്പെട്ട ഒരു തീയതിയാണ്. 2026-27 സാമ്പത്തിക വര്‍ഷത്തെ അഡ്വാന്‍സ് ടാക്സിന്റെ ആദ്യ ഗഡു ഈ തീയതിക്കുള്ളില്‍ അടയ്ക്കണം. പ്രതീക്ഷിക്കുന്ന നികുതി ബാധ്യത 10,000 രൂപയ്ക്ക് മുകളിലുള്ള വ്യക്തികള്‍, തങ്ങളുടെ ഏകദേശ നികുതി ബാധ്യതയുടെ 15 ശതമാനം ഈ സമയപരിധിക്കുള്ളില്‍ അടയ്ക്കേണ്ടതുണ്ട്. സമയപരിധി തെറ്റിച്ചാല്‍ പലിശ ഈടാക്കാന്‍ സാധ്യതയുണ്ട്.

എംപ്ലോയീസ് പ്രൊവിഡന്റ് ഫണ്ട് ഓര്‍ഗനൈസേഷന്‍ പ്രോവിഡന്റ് ഫണ്ട് തുക യുപിഐ വഴി പിന്‍വലിക്കാന്‍ സഹായിക്കുന്ന ഒരു സംവിധാനം പരീക്ഷിച്ചുവരുന്നതായി റിപ്പോര്‍ട്ടുകള്‍ സൂചിപ്പിക്കുന്നു. ഇത് നടപ്പിലാക്കുകയാണെങ്കില്‍, പണം പിന്‍വലിക്കുന്നതിനുള്ള നടപടിക്രമങ്ങളുടെ സമയം കുറയ്ക്കാനും പ്രക്രിയ ലളിതമാക്കാനും സഹായിക്കും.