ന്യൂഡല്‍ഹി: കടുത്ത സൗര വികിരണം മൂലം എ320 ശ്രേണിയില്‍പ്പെട്ട വിമാനങ്ങളുടെ ഫ്‌ലൈറ്റ് കണ്‍ട്രോള്‍ ഡേറ്റയ്ക്ക് തകരാര്‍ സംഭവിക്കാമെന്ന വിമാന നിര്‍മ്മാണ കമ്പനിയായ എയര്‍ബസിന്റെ സുരക്ഷാ മുന്നറിയിപ്പിനെ തുടര്‍ന്ന് രാജ്യത്ത് വിമാനങ്ങളുടെ സര്‍വീസ് തടസ്സപ്പെടാന്‍ സാധ്യത. എ320 മോഡല്‍ വിഭാഗത്തില്‍പ്പെട്ട വലിയൊരു പങ്ക് വിമാനങ്ങളില്‍ സോഫ്റ്റ്വെയര്‍ അല്ലെങ്കില്‍ ഹാര്‍ഡ്വെയര്‍ അപ്ഗ്രഡേഷന്‍ നടത്തണമെന്ന് എയര്‍ബസ് അടിയന്തരനിര്‍ദേശം നല്‍കി. ഇതിനെ തുടര്‍ന്ന് പ്രശ്‌നം പരിഹരിക്കാന്‍ ഇന്‍ഡിഗോ, എയര്‍ഇന്ത്യ, എയര്‍ഇന്ത്യ എക്‌സ്പ്രസ് എന്നി വിമാന കമ്പനികള്‍ നടപടി സ്വീകരിക്കുന്നത് വഴി രാജ്യത്തെ 200-250 വിമാനങ്ങളുടെ പ്രവര്‍ത്തനത്തെ ബാധിച്ചേക്കാമെന്നാണ് റിപ്പോര്‍ട്ടുകള്‍ വ്യക്തമാക്കുന്നത്.
ആഗോളതലത്തില്‍, പ്രവര്‍ത്തനക്ഷമമായ 6,000 എ320 വിമാനങ്ങള്‍ അപ്ഗ്രേഡിന് വിധേയമാകേണ്ടി വരാം. രാജ്യത്തെ ആഭ്യന്തര വിമാനക്കമ്പനികളുടെ കൈവശമുള്ള നാരോ-ബോഡി എ320 വിമാനങ്ങളില്‍ പലതും സോഫ്റ്റ്വെയര്‍ മാറ്റങ്ങള്‍ക്കോ ചില സന്ദര്‍ഭങ്ങളില്‍ ഹാര്‍ഡ്വെയര്‍ പുനഃക്രമീകരണത്തിനോ വിധേയമാകാന്‍ സാധ്യതയുണ്ട്. അതിനാല്‍ വിമാനങ്ങള്‍ നിലത്തിറക്കേണ്ടിവരുമെന്നതിനാല്‍ പ്രവര്‍ത്തന തടസ്സം ഉണ്ടാകാമെന്നാണ് വിമാന സര്‍വീസ് വൃത്തങ്ങളെ ഉദ്ധരിച്ചുള്ള റിപ്പോര്‍ട്ടുകളില്‍ പറയുന്നത്.
ഇന്ത്യന്‍ ഓപ്പറേറ്റര്‍മാര്‍ക്ക് ഏകദേശം 560 എ320 വിമാനങ്ങളുണ്ട്. അവയില്‍ 200-250 എണ്ണത്തിന് സോഫ്റ്റ്വെയര്‍ മാറ്റങ്ങളോ ഹാര്‍ഡ്വെയര്‍ പുനഃക്രമീകരണമോ ആവശ്യമായി വരുമെന്നാണ് റിപ്പോര്‍ട്ടുകള്‍ ചൂണ്ടിക്കാണിക്കുന്നത്. പ്രശ്‌നം പരിഹരിക്കുന്നതിന് എയര്‍ബസുമായി ചേര്‍ന്ന് പ്രവര്‍ത്തിക്കുകയാണെന്നും വിമാന സര്‍വീസ് തടസ്സപ്പെടാതിരിക്കാന്‍ എല്ലാ ശ്രമവും നടത്തുമെന്നും ചില സർവീസുകളുടെ സമയത്തിൽ മാറ്റം വന്നേക്കാമെന്നും ഇന്‍ഡിഗോ പ്രസ്താവനയിലൂടെ അറിയിച്ചു. 'സോഫ്റ്റ് വെയര്‍, ഹാര്‍ഡ് വെയര്‍ പ്രശ്‌നം പരിഹരിക്കുന്നതിന് സമയമെടുക്കാം. ഇതുമൂലം ഞങ്ങളുടെ ഷെഡ്യൂള്‍ ചെയ്ത പ്രവര്‍ത്തനങ്ങളില്‍ കാലതാമസത്തിന് കാരണമാകാം. യാത്രക്കാര്‍ക്ക് ഇതുമൂലം ഉണ്ടായേക്കാവുന്ന അസൗകര്യത്തില്‍ ഖേദിക്കുന്നു,'- എയര്‍ ഇന്ത്യ എക്‌സില്‍ കുറിച്ചു. എത്ര വിമാനങ്ങളാണ് സാങ്കേതികതകരാര്‍ നേരിടേണ്ടി വരിക എന്ന കാര്യത്തില്‍ മൂന്ന് വിമാനക്കമ്പനികളും വ്യക്തത വരുത്തിയിട്ടില്ല.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
