മുംബൈ: തുടര്‍ച്ചയായി മൂന്ന് ദിവസം മുന്നേറ്റം കാഴ്ചവെച്ച ഓഹരി വിപണിയില്‍ ഇന്ന് തകര്‍ച്ച. വിപണിയുടെ തുടക്കത്തില്‍ ബിഎസ്ഇ സെന്‍സെക്‌സ് 500 പോയിന്റ് ആണ് താഴ്ന്നത്. 25,300 പോയിന്റില്‍ താഴെയാണ് നിഫ്റ്റിയില്‍ വ്യാപാരം തുടരുന്നത്.
ലാഭമെടുപ്പാണ് ഓഹരി വിപണിയില്‍ പ്രതിഫലിച്ചതെന്ന് വിപണി വിദഗ്ധര്‍ അഭിപ്രായപ്പെട്ടു. കൂടാതെ ഐടി, റിയല്‍റ്റി ഓഹരികളില്‍ ഉണ്ടായ ഇടിവും വിപണിയില്‍ ഒന്നടങ്കം പ്രതിഫലിച്ചു. ഐടി, എഫ്എംസിജി, സ്വകാര്യ ബാങ്ക്, കണ്‍സ്യൂമര്‍ ഡ്യൂറബിള്‍സ് ഓഹരികള്‍ ഒരുശതമാനം വരെയാണ് ഇടിഞ്ഞത്. അതിനിടെ അദാനി ഗ്രൂപ്പ് ഓഹരികള്‍ മുന്നേറ്റം കാഴ്ചവെച്ചു. അദാനി ഗ്രൂപ്പ് കമ്പനികള്‍ക്ക് സെബി ക്ലീന്‍ ചിറ്റ് നല്‍കിയതാണ് തുണയായത്. അദാനി പവര്‍, അദാനി ഗ്രീന്‍ എനര്‍ജി, അദാനി ടോട്ടല്‍ ഗ്യാസ് ഓഹരികള്‍ 10 ശതമാനം വരെയാണ് ഉയര്‍ന്നത്.
ഇതിന് പുറമേ ഫാര്‍മ, പൊതുമേഖല ബാങ്ക്, എണ്ണ, പ്രകൃതി വാതക ഓഹരികള്‍ മാത്രമാണ് നേട്ടം ഉണ്ടാക്കിയത്. 1.6 ശതമാനം വരെയാണ് ഈ ഓഹരികള്‍ കുതിച്ചത്. ഏഷ്യന്‍ വിപണിയില്‍ ഇന്ന് സമ്മിശ്ര പ്രതികരണമാണ്. ഇതും ഇന്ത്യന്‍ വിപണിയെ സ്വാധീനിച്ചതായും വിപണി വിദഗ്ധര്‍ പറയുന്നു. അതിനിടെ ഡോളറിനെതിരെ രൂപ ഇന്നും ഇടിഞ്ഞു. യുഎസ് ഫെഡറല്‍ റിസര്‍വ് പലിശനിരക്ക് കുറച്ചതിനെ തുടര്‍ന്ന് ഡോളര്‍ ശക്തിയാര്‍ജിച്ചതാണ് ഇന്നും രൂപയ്ക്ക് വിനയായത്. ഡോളറിനെതിരെ ഏഴു പൈസയുടെ നഷ്ടത്തോടെ 88.20 എന്ന നിലയിലാണ് രൂപയുടെ മൂല്യം.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
