ന്യൂയോര്ക്ക്: മെറ്റയിലെ കൂട്ടപ്പിരിച്ചുവിടല് നാളെ. ഏകദേശം 8,000 പേരെ പിരിച്ചുവിടാനാണ് മെറ്റ തയ്യാറെടുക്കുന്നത്. ഏകദേശം 10 ശതമാനം ജീവനക്കാരെയാണ് പിരിച്ചുവിടുന്നത്. കമ്പനി ഇതുവരെ നിയമനം നടത്തിവന്ന 6,000 ഒഴിവുകള് നിര്ത്തലാക്കുകയും ചെയ്യും.
പിരിച്ചുവിടല് നടപടികളുമായി ബന്ധപ്പെട്ട ഇമെയിലുകള് പ്രാദേശിക സമയം രാവിലെ നാലിന് എത്തുമെന്നും ജോലിയില് തുടരുന്ന ഏകദേശം 7,000 ജീവനക്കാരെ നാല് പുതിയ എഐ കേന്ദ്രീകൃത സംവിധാനങ്ങളിലേക്ക് മാറ്റുമെന്നും എച്ച്ആര് മേധാവി ജാനല് ഗെയില് അയച്ച ആഭ്യന്തര മെമ്മോ ചോര്ന്നുകിട്ടിയതിനെ ഉദ്ധരിച്ച് റോയിട്ടേഴ്സ് വാര്ത്താ ഏജന്സി റിപ്പോര്ട്ടു ചെയ്യുന്നു.
പിരിച്ചുവിടല് ചെലവ് ചുരുക്കലിനല്ല പകരം ഉത്പാദനക്ഷമത വര്ധിപ്പിക്കുന്നതിന് വേണ്ടിയാണെന്ന് എച്ച്ആര് മേധാവിയുടെ ആഭ്യന്തര മെമ്മോയില് പറയുന്നു. പല ടീമുകള്ക്കും നിലവില് ചെറിയ ഗ്രൂപ്പുകളായും കുറഞ്ഞ മാനേജ്മെന്റ് തലങ്ങളോടും കൂടി പ്രവര്ത്തിക്കാന് കഴിയും. പല സ്ഥാപനങ്ങള്ക്കും ലളിതമായ ഘടനയോടെ പ്രവര്ത്തിക്കാന് കഴിയുന്ന ഘട്ടമാണിത്. പുനര്വിന്യാസിക്കുന്ന 7000 ജീവനക്കാരെ ഉള്ക്കൊള്ളുന്ന നാല് പുതിയ സംവിധാനങ്ങളും എഐയെ അടിസ്ഥാനമാക്കി പ്രവര്ത്തിക്കുന്നവ ആയിരിക്കുമെന്നും മെമ്മോയില് പറയുന്നു.
യുഎസില് പിരിച്ചുവിടപ്പെടുന്നവര്ക്ക് 16 ആഴ്ചത്തെ അടിസ്ഥാന ശമ്പളം ആനുകൂല്യമായി ലഭിക്കും. കൂടാതെ മെറ്റയില് ജോലി ചെയ്ത ഓരോ വര്ഷവും കണക്കിലെടുത്ത് അധിക ആനുകൂല്യങ്ങളും ലഭിക്കും. ഹെല്ത്ത് കെയറും കരിയര് പിന്തുണയും മെറ്റ വാഗ്ദാനം ചെയ്യുന്നുണ്ട്. യുഎസിന് പുറത്തുള്ള ജീവനക്കാര്ക്ക് വ്യത്യസ്തമായ പാക്കേജുകള് ലഭിക്കും.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
