ന്യൂഡല്‍ഹി: പ്രമുഖ വാഹനനിര്‍മ്മാതാക്കളായ മഹീന്ദ്ര ആന്റ് മഹീന്ദ്രയും ഇലക്ട്രിക് വാഹനനിര്‍മ്മാണരംഗത്തേയ്ക്ക്. അടുത്ത വര്‍ഷം ആദ്യപാദത്തില്‍ എക്‌സ് യുവി 300 എസ് യുവിയുടെ സമ്പൂര്‍ണ ഇലക്ട്രിക് വേര്ഷന് വിപണിയില്‍ ഇറക്കുമെന്ന് കമ്പനി അറിയിച്ചു.ഇതിന് മുന്നോടിയായി ഓഗസ്റ്റില്‍ ഇലക്ട്രിക് വാഹനങ്ങളുടെ വിപണി തന്ത്രം പുറത്തിറക്കും.
സമ്പൂര്‍ണ ഇലക്ട്രിക് വാഹനം പുറത്തിറക്കുന്നതിന്റെ ഭാഗമായി പ്രമുഖ കമ്പനിയായ ഫോക്‌സ് വാഗണുമായി മഹീന്ദ്ര ആന്റ് മഹീന്ദ്ര സഹകരിക്കുന്നുണ്ട്. ഫോക്‌സ് വാഗണിന്റെ മോഡുലര്‍ ഇലക്ട്രിക് ഡ്രൈവ് മെട്രിക്‌സ് സാങ്കേതികവിദ്യയുടെ സാധ്യത പ്രയോജനപ്പെടുത്തുന്നതിന്റെ ഭാഗമായാണ് പങ്കാളിത്തം. ഇലക്ട്രിക് കാറുകളില്‍ ഈ സാങ്കേതികവിദ്യയാണ് ഉപയോഗിക്കുന്നത്. ചെലവും സമയവും ലാഭിക്കാന്‍ ഈ സാങ്കേതികവിദ്യ സഹായകമാകുമെന്നാണ് വിലയിരുത്തല്‍.
എക്‌സ് യുവി 300 എസ് യുവിയുടെ ഇലക്ട്രിക് വേര്ഷന് 4.2 മീറ്ററാണ് നീളമുണ്ടാകുക. ഇലക്ട്രിക് വാഹനവുമായി ബന്ധപ്പെട്ട കമ്പനിയുടെ ആശയം ഓഗസ്റ്റില്‍ വെളിപ്പെടുത്തുമെന്ന് എക്‌സിക്യൂട്ടീവ് ഡയറക്ടര്‍ രാജേഷ് ജെജുരിക്കര്‍ അറിയിച്ചു.
അടുത്തിടെ പുറത്തിറക്കിയ എക്‌സ് യുവി 700 മികച്ച വിജയം നേടി. ബുക്ക് ചെയ്താല്‍ 18 മുതല്‍ 24 മാസം വരെയാണ് കാത്തിരിക്കേണ്ടത്. എന്നിട്ടും ബുക്കിംഗ് കാന്‍സല്‍ ചെയ്യുന്നവരുടെ എണ്ണം കുറവാണെന്നും കമ്പനി അറിയിച്ചു. പ്രതിമാസം 5000 എക്‌സ് യുവി 700 വാഹനങ്ങളാണ്് നിര്‍മ്മിക്കുന്നത്. എന്നാല്‍ എല്ലാം മാസവും പതിനായിരത്തോളം ബുക്കിംഗാണ് ലഭിക്കുന്നത്. സെമികണ്ടക്ടറുകളുടെ ലഭ്യത വര്‍ധിക്കുന്ന മുറയ്ക്ക് നിര്‍മ്മാണശേഷി ഉയര്‍ത്തുമെന്നും കമ്പനി പ്രത്യാശ പ്രകടിപ്പിച്ചു.
ഈ വാര്‍ത്ത കൂടി വായിക്കാം
സമകാലിക മലയാളം ഇപ്പോള്‍ വാട്ട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ അറിയാന്‍ ക്ലിക്ക് ചെയ്യൂ
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
