ഫോബ്‌സ് പട്ടികയിൽ പത്താമനായി മുകേഷ് അംബാനി; അതിസമ്പന്നരിൽ മലയാളികളിൽ ഒന്നാമൻ യൂസഫലി 

ദുബായ്: ഫോബ്‌സിന്റെ ഈ വർഷത്തെ പട്ടികയിൽ മലയാളികളായ അതിസമ്പന്നരിൽ ഒന്നാമൻ ലുലു ഗ്രൂപ്പ് ചെയർമാൻ എം എ യൂസഫലി. 540 കോടി ഡോളറിന്റെ ആസ്തിയാണ് യൂസഫലിക്കുള്ളത്. രാജ്യാന്തര തലത്തിൽ 490ാം സ്ഥാനമാണ് അദ്ദേഹത്തിനുള്ളത്. ഇന്ത്യയിലെ റിലയൻസ് ഇൻഡസ്ട്രീസ് ചെയർമാൻ മുകേഷ് അംബാനിയും, ഗൗതം അദാനിയും ലോകത്തിലെ സമ്പന്നരുടെ പട്ടികയിൽ 10, 11 സ്ഥാനങ്ങളിലാണ്. 

എസ് ഗോപാലകൃഷ്ണൻ (ഇൻഫോസിസ്) 410 കോടി, ബൈജു രവീന്ദ്രൻ (ബൈജൂസ് ആപ്) 360 കോടി, രവി പിള്ള (ആർപി ഗ്രൂപ്പ്) 260 കോടി, എസ് ഡി ഷിബുലാൽ (ഇൻഫോസിസ്) 220 കോടി, സണ്ണി വർക്കി (ജെംസ് ഗ്രൂപ്പ്) 210 കോടി, ജോയ് ആലുക്കാസ് (ജോയ്ആലുക്കാസ് ഗ്രൂപ്പ്) 190 കോടി, ജോർജ് അലക്സാണ്ടർ മുത്തൂറ്റ്, ജോർജ് ജേക്കബ് മുത്തൂറ്റ്, ജോർജ് തോമസ് മുത്തൂറ്റ്, സാറ ജോർജ് മുത്തൂറ്റ്(മുത്തൂറ്റ് ഗ്രൂപ്പ്) 140 കോടി വീതം എന്നിവരാണ് പട്ടികയിലുള്ള മറ്റു പ്രമുഖരായ മലയാളികൾ. 

21,900 കോടി ഡോളർ ആസ്തിയുമായി ടെസ്‌ല മേധാവി ഇലോൺ മസ്ക് ലോകത്തെ ഏറ്റവും വലിയ സമ്പന്നനായി. ആമസോൺ സിഇഒ ജെഫ് ബെസോസ് (17,100 കോടി), ഫ്രഞ്ച് ഫാഷൻ രംഗത്തെ ബെർനാഡ് അർനോൾട്ട്  (15,800 കോടി) എന്നിവരാണ് രണ്ടും മൂന്നും സ്ഥാനങ്ങളിൽ. ബിൽഗേറ്റ്സ് (മൈക്രോസോഫ്റ്റ്) 12,900 കോടി, വാറൻ ബഫറ്റ് (11,800 കോടി) എന്നിവർ ആദ്യ അഞ്ചിൽ ഇടംനേടി.മുകേഷ് അംബാനിയാണ് ഇന്ത്യക്കാരിൽ ഒന്നാമത്. 9,070 കോടി ഡോളറിന്റെ ആസ്തിയോടെ രാജ്യാന്തര തലത്തിൽ പട്ടികയിൽ പത്താമതാണ് മുകേഷ് അംബാനിയുടെ സ്ഥാനം. കഴിഞ്ഞവർഷം ഇന്ത്യയിൽ നിന്നുള്ള ശതകോടീശ്വരന്മാർ 140 പേരായിരുന്നെങ്കിൽ ഇത്തവണ അത് 166 പേരായി. 6 ശതകോടീശ്വരന്മാരുടെ വർദ്ധനവാണ് ഉണ്ടായിരിക്കുന്നത്. ഇത് റെക്കോർഡ് വർധനവാണ്.

ഈ വാര്‍ത്ത കൂടി വായിക്കാം: മൂന്നാം ദിനവും മാറ്റമില്ലാതെ സ്വര്‍ണ വില

സമകാലിക മലയാളം ഇപ്പോള്‍ വാട്ട്സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ അറിയാന്‍ ക്ലിക്ക് ചെയ്യൂ