ന്യൂഡല്ഹി: ജനങ്ങളുടെ സമ്പാദ്യശീലം വളര്ത്തുന്നതിന് വേണ്ടിയാണ് കേന്ദ്രസര്ക്കാര് ലഘുസമ്പാദ്യ പദ്ധതികള് ആവിഷ്കരിച്ചത്. ഇത്തരത്തിലുള്ള ഒരു പദ്ധതിയാണ് കിസാന് വികാസ് പത്ര. കിസാന് വികാസ് പത്രയില് നിക്ഷേപിക്കുന്നവര്ക്ക് 115 മാസം ( ഒന്പത് വര്ഷവും ഏഴു മാസവും) കഴിയുമ്പോള് ഇരട്ടി തുക ലഭിക്കുമെന്നതാണ് പ്രത്യേകത. കോമ്പൗണ്ടിങ് ആണ് മെച്ചപ്പെട്ട റിട്ടേണ് ലഭിക്കാന് സഹായകമാകുന്നത്.
നിലവില് 7.5 ശതമാനമാണ് പദ്ധതിയുടെ വാര്ഷിക കൂട്ടുപലിശ. ലഘു സമ്പാദ്യ പദ്ധതികളുടെ പലിശനിരക്ക് മൂന്നുമാസം കൂടുമ്പോള് കേന്ദ്രസര്ക്കാര് നിര്ണയിക്കാറുണ്ട്. സാഹചര്യങ്ങള് അനുസരിച്ച് പലിശനിരക്ക് കൂട്ടുകയോ കുറയ്ക്കുകയോ ആണ് കേന്ദ്രസര്ക്കാര് ചെയ്ത് വരുന്നത്. സര്ക്കാരിന്റെ പിന്തുണ ഉള്ളത് കൊണ്ട് സുരക്ഷിതമായ നിക്ഷേപ പദ്ധതിയാണിത്.
നികുതി ഇളവിന് ഈ പ്ലാന് ഉപയോഗിക്കാന് സാധിക്കില്ല. പദ്ധതിയുടെ കാലാവധി തീരുന്നതിന് മുന്പ് അക്കൗണ്ട് ഉടമ മരിച്ചുപോകുന്നത് അടക്കം ചില സാഹചര്യങ്ങളില് ഇടയ്ക്ക് വച്ച് തുക പിന്വലിക്കാനും അനുവദിക്കും.
കിസാന് വികാസ് പത്രയില് ആയിരം രൂപയാണ് കുറഞ്ഞ നിക്ഷേപം. തുടര്ന്ന് നൂറ് രൂപയുടെ ഗുണിതങ്ങളായി കൂടുതല് നിക്ഷേപിക്കാനും അവസരമുണ്ട്. പരിധിയില്ലാതെ എത്ര വേണമെങ്കിലും പദ്ധതിയില് നിക്ഷേപിക്കാവുന്നതാണ്. റിസ്ക് എടുക്കാന് താല്പ്പര്യമില്ലാത്തവര്ക്ക് ഗ്യാരണ്ടി റിട്ടേണ് നല്കുന്നതാണ് പദ്ധതി.
നിലവിലെ പലിശനിരക്ക് അനുസരിച്ച് അഞ്ചുലക്ഷം രൂപയാണ് നിക്ഷേപിക്കുന്നതെങ്കില് കാലാവധി തീരുമ്പോള് പത്തുലക്ഷം രൂപ ലഭിക്കും. 50 ലക്ഷം രൂപയാണ് നിക്ഷേപിക്കുന്നതെങ്കില് പത്തുവര്ഷം കഴിയുമ്പോള് ഒരു കോടി രൂപ ലഭിക്കാനും ഈ പദ്ധതി സഹായകമാണ്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
