തിരിച്ചുകയറി രൂപ; രണ്ടുദിവസത്തിനിടെ 32 പൈസയുടെ നേട്ടം; ഓഹരി വിപണിയിലും മുന്നേറ്റം, എണ്ണ വില താഴ്ന്നു

മുംബൈ: ഡോളറിനെതിരെ രൂപയുടെ മൂല്യം ഉയര്‍ന്നു. 20 പൈസയുടെ നേട്ടത്തോടെ 87.43 എന്ന നിലയിലാണ് ഇന്ന് രൂപയുടെ വ്യാപാരം അവസാനിച്ചത്. ഡോളര്‍ ദുര്‍ബലമായതും ഓഹരി വിപണിയിലെ മുന്നേറ്റവുമാണ് രൂപയ്ക്ക് തുണയായത്.

87.63 എന്ന നിലയിലാണ് ഇന്ന് രൂപയുടെ വിനിമയം ആരംഭിച്ചത്. ഒരു ഘട്ടത്തില്‍ 87.28 എന്ന നിലയിലേക്ക് രൂപയുടെ മൂല്യം ഉയര്‍ന്നിരുന്നു. തുടര്‍ന്ന് 20 പൈസയുടെ നേട്ടത്തോടെ രൂപയുടെ വ്യാപാരം ക്ലോസ് ചെയ്യുകയായിരുന്നു. ഇന്നലെ 12 പൈസയുടെ നേട്ടമാണ് രൂപ സ്വന്തമാക്കിയത്. അതിനിടെ ഇന്ത്യ മുഖ്യമായി ആശ്രയിക്കുന്ന ബ്രെന്‍ഡ് ക്രൂഡിന്റെ വിലയും താഴ്ന്നു. 65.76ലേക്കാണ് വില താഴ്ന്നത്. പണപ്പെരുപ്പ നിരക്ക് കുറഞ്ഞതും രൂപയുടെ മൂല്യത്തെ സ്വാധീനിച്ചതായി വിദഗ്ധര്‍ പറയുന്നു. എട്ടുവര്‍ഷത്തെ ഏറ്റവും താഴ്ന്ന നിലയായ 1.55ലേക്കാണ് ജൂലൈയിലെ പണപ്പെരുപ്പനിരക്ക് കുറഞ്ഞത്.

ഓഹരി വിപണിയിലും നേട്ടത്തിലാണ് വ്യാപാരം അവസാനിപ്പിച്ചത്. ബിഎസ്ഇ സെന്‍സെക്‌സ് 304 പോയിന്റ് നേട്ടത്തോടെ 80,539 പോയിന്റിലാണ് വ്യാപാരം അവസാനിപ്പിച്ചത്. നിഫ്റ്റി 24500 പോയിന്റിന് മുകളിലാണ്.അപ്പോളോ ഹോസ്പിറ്റല്‍, ഇന്‍ഫോസിസ്, എച്ച്ഡിഎഫ്‌സി ബാങ്ക്, ഭാരതി എയര്‍ടെല്‍ ഓഹരികളാണ് പ്രധാനമായി നേട്ടം ഉണ്ടാക്കിയത്.