ന്യൂഡല്‍ഹി: കേന്ദ്ര സര്‍ക്കാര്‍ ജീവനക്കാര്‍ക്കുള്ള പുതിയ യൂണിഫൈഡ് പെന്‍ഷന്‍ സ്‌കീം (യുപിഎസ്) നിലവില്‍ വന്നു. നിലവിലെ എന്‍പിഎസില്‍ (നാഷനല്‍ പെന്‍ഷന്‍ സിസ്റ്റം) നിന്ന് യുപിഎസിലേക്ക് മാറാന്‍ ആഗ്രഹിക്കുന്നവര്‍ ജൂണ്‍ 30ന് മുന്‍പായി ഓണ്‍ലൈനായോ നേരിട്ടോ അപേക്ഷ നല്‍കണം. ഇല്ലെങ്കില്‍ നിലവിലെ എന്‍പിഎസില്‍ തന്നെ തുടരും. ഖജനാവിന് ഉണ്ടാവുന്ന പെന്‍ഷന്‍ ബാധ്യത കുറയ്ക്കാനായി 2024 ഓഗസ്റ്റിലാണ് കേന്ദ്രസര്‍ക്കാര്‍ യുപിഎസ് പ്രഖ്യാപിച്ചത്. npscra.nsdl.co.in/ups.php എന്ന വെബ്‌സൈറ്റ് വഴിയാണ് അപേക്ഷ നല്‍കേണ്ടത്.
പുതിയ പെന്‍ഷന്‍ പദ്ധതിയും (NPS) ഏകീകൃത പെന്‍ഷന്‍ പദ്ധതിയും (UPS) തമ്മിലുള്ള വ്യത്യാസം?
പ്രധാന വ്യത്യാസം പെന്‍ഷന്‍ ഗ്യാരണ്ടിയിലും നിക്ഷേപ സമീപനത്തിലുമാണ്. എന്‍പിഎസ് ഉയര്‍ന്ന വരുമാനമുള്ളതും എന്നാല്‍ ഗ്യാരണ്ടീഡ് പെന്‍ഷന്‍ ഇല്ലാത്തതുമായ മാര്‍ക്കറ്റ്-ലിങ്ക്ഡ് ആണെങ്കില്‍ യുപിഎസ് ഒരു ഗ്യാരണ്ടീഡ് മിനിമം പെന്‍ഷന്‍ വാഗ്ദാനം ചെയ്യുന്നു. അതുവഴി സ്ഥിര വരുമാനം ഉറപ്പാക്കുന്നു.
എന്‍പിഎസ് അതിന്റെ കോര്‍പ്പസിന്റെ ഒരു ഭാഗം ഇക്വിറ്റികള്‍, കോര്‍പ്പറേറ്റ് ബോണ്ടുകള്‍, സര്‍ക്കാര്‍ സെക്യൂരിറ്റികള്‍ തുടങ്ങിയ മാര്‍ക്കറ്റ്-ലിങ്ക്ഡ് ഉപകരണങ്ങളില്‍ നിക്ഷേപിക്കുന്നു. എന്നാല്‍ പെന്‍ഷന്‍ തുക ഗ്യാരണ്ടിയുള്ളതല്ല. ഇത് കോര്‍പ്പസിനെയും നിക്ഷേപ വരുമാനത്തെയും ആശ്രയിച്ചിരിക്കുന്നു. എന്‍പിഎസില്‍ വിഹിതത്തിനും ലഭിച്ച പെന്‍ഷനും നികുതി ആനുകൂല്യം വാഗ്ദാനം ചെയ്യുന്നു. കൂടാതെ നിക്ഷേപ ഓപ്ഷനുകളും അടയ്ക്കുന്ന തുകയുടെ തോതും തെരഞ്ഞെടുക്കുന്നതില്‍ കൂടുതല്‍ ഫ്‌ളെക്‌സിബിലിറ്റി നല്‍കുന്നു. കോര്‍പ്പസിലേക്കുള്ള വിഹിതത്തിന്റെ കാര്യത്തില്‍ ജീവനക്കാരനും തൊഴിലുടമയും എന്‍പിഎസിലേക്ക് നിശ്ചിത വിഹിതം അടയ്ക്കുന്നു.
മറുവശത്ത്, യുപിഎസില്‍, നിക്ഷേപ തന്ത്രത്തിന്റെ വിശദാംശങ്ങള്‍ ഇതുവരെ വെളിപ്പെടുത്തിയിട്ടില്ല. പക്ഷേ യുപിഎസ് സ്ഥിരതയുള്ള വരുമാനം അല്ലെങ്കില്‍ മിനിമം പെന്‍ഷന്‍ തുക ഉറപ്പാക്കുന്നു.
എന്‍പിഎസ് നിലവില്‍ വന്ന 2004 ജനുവരി 1 മുതല്‍ കേന്ദ്രസര്‍വീസില്‍ പ്രവേശിച്ചവര്‍ക്കാണ് മാറാന്‍ അവസരം. നിലവിലുള്ള ജീവനക്കാര്‍ എ2 ഫോമും ഇന്നലെ മുതല്‍ ജോലിയില്‍ പ്രവേശിച്ചവര്‍ എ1 ഫോമും ഉപയോഗിക്കണം. പെന്‍ഷന്‍ ഫണ്ട് റഗുലേറ്ററി ആന്‍ഡ് ഡവലപ്‌മെന്റ് അതോറിറ്റിക്കാണ് (പിഎഫ്ആര്‍ഡിഎ) യുപിഎസിന്റെ ചുമതല. നാഷനല്‍ പെന്‍ഷന്‍ സിസ്റ്റത്തിന്റെ (എന്‍പിഎസ്) ഭാഗമായ ജീവനക്കാര്‍ യുപിഎസിലേക്കു മാറുമ്പോള്‍ നിലവില്‍ അവരുടെ പെന്‍ഷന്‍ അക്കൗണ്ടിലെ തുക യുപിഎസിന്റെ വ്യക്തിഗത സഞ്ചിതനിധിയിലേക്കു (കോര്‍പസ്) നീക്കും.
പെന്‍ഷന്‍ എത്ര കിട്ടും?
യുപിഎസ് സ്‌കീമില്‍ എത്ര രൂപ പ്രതിമാസ പെന്‍ഷന്‍ ലഭിക്കുമെന്ന് കണക്കാക്കാന്‍ യുപിഎസ് കാല്‍ക്കുലേറ്ററും പിഎഫ്ആര്‍ഡിഎ ഓണ്‍ലൈനായി ലഭ്യമാക്കിയിട്ടുണ്ട്. ലിങ്ക്: bit.ly/upscalcu. ജോലിക്കു ചേര്‍ന്ന തീയതി, അടിസ്ഥാന ശമ്പളം, വിരമിക്കുന്ന തീയതി തുടങ്ങിയവ നല്‍കിയാല്‍ മതി.
യുപിഎസിലേക്ക് ഓണ്‍ലൈനായി മാറാന്‍
enps.nsdl.com എന്ന വെബ്‌സൈറ്റില്‍ യൂണിഫൈഡ് പെന്‍ഷന്‍ സ്‌കീമിനു താഴെയുള്ള 'NPS to UPS Migration' ഓപ്ഷനെടുക്കുക.
എന്‍പിഎസിലെ പ്രാണ്‍ ഐഡി (പെര്‍മനന്റ് റിട്ടയര്‍മെന്റ് അക്കൗണ്ട് നമ്പര്‍) ജനനത്തീയതി നല്‍കി ലോഗിന്‍ ചെയ്യുക. ഒടിപി വെരിഫിക്കേഷനു ശേഷം ഡിക്ലറേഷന്‍ വിന്‍ഡോ തുറക്കും. യുപിഎസിലേക്ക് മാറാന്‍ ആഗ്രഹിക്കുന്നുവെന്ന സാക്ഷ്യപ്പെടുത്തലാണിത്.
വായിച്ചുനോക്കിയ ശേഷം 'I have accepted...' എന്നതില്‍ ടിക് ചെയ്ത് ഇ-സൈനിങ്ങിലേക്ക് നീങ്ങുക. ആധാര്‍ നമ്പര്‍ നല്‍കി ഇ-സൈന്‍ ചെയ്യാം. ഒടിപി നല്‍കിയ ശേഷം, മൈഗ്രേഷന്‍ ഫോം ഭാവി ആവശ്യങ്ങള്‍ക്കായി ഡൗണ്‍ലോഡ് ചെയ്യാം. പുതിയ ജീവനക്കാര്‍ 'Register for UPS' ഓപ്ഷന്‍ ഉപയോഗിക്കണം.
ഓഫ്‌ലൈനായി
· npscra.nsdl.co.in/ups.php എന്ന ലിങ്കില്‍ നിന്ന് ഫോം എ2 ഡൗണ്‍ലോഡ് ചെയ്ത് പൂരിപ്പിച്ച് ഡ്രോയിങ് ആന്‍ ഡിസ്‌ബേഴ്‌സിങ് ഓഫിസര്‍ക്ക് (ഡിഡിഒ) നേരിട്ട് നല്‍കാം.
വിഹിതം എത്ര?
എന്‍പിഎസിലെന്നപോലെ, യുപിഎസിലും, ജീവനക്കാരനും തൊഴിലുടമയും കോര്‍പ്പസിലേക്ക് വിഹിതം അടയ്ക്കുന്നു. യുപിഎസില്‍, ജീവനക്കാരുടെ വിഹിതം ഡിഎയ്ക്കൊപ്പം അടിസ്ഥാന ശമ്പളത്തിന്റെ 10 ശതമാനം ആണ്. കൂടാതെ സര്‍ക്കാര്‍ വിഹിതം 18.5 ശതമാനമാണ്. എന്‍പിഎസില്‍, ജീവനക്കാരുടെ വിഹിതം 10 ശതമാനം ആണ്. 14 ശതമാനമാണ് സര്‍ക്കാര്‍ വിഹിതം.
യുപിഎസിന്റെ മറ്റൊരു നേട്ടം, ഒരാള്‍ക്ക് ഗ്രാറ്റുവിറ്റി ലഭിക്കാന്‍ ഇത് അനുവദിക്കുന്നു എന്നതാണ്. കൂടാതെ നല്‍കേണ്ട പരമാവധി ഗ്രാറ്റുവിറ്റി ശമ്പളത്തിന്റെ 16.5 മടങ്ങ് അല്ലെങ്കില്‍ 25 ലക്ഷം രൂപ, ഇതില്‍ ഏതാണ് കുറവ് അത് നല്‍കും. ഗ്രാറ്റുവിറ്റിക്ക് പുറമേ, യുപിഎസ് വരിക്കാര്‍ക്ക് വിരമിക്കുമ്പോള്‍ ഒരു ലംപ്-സം പേയ്മെന്റും ഉറപ്പായ പെന്‍ഷനും ലഭിക്കും. പുതിയ പദ്ധതി വിരമിക്കുന്നതിന് തൊട്ടുമുന്‍പുള്ള 12 മാസത്തെ ശരാശരി അടിസ്ഥാന ശമ്പളത്തിന്റെ 50 ശതമാനം പെന്‍ഷന്‍ ഉറപ്പുനല്‍കുന്നു. അതേസമയം എന്‍പിഎസ് വിപണിയുമായി ബന്ധപ്പെട്ട വരുമാനമാണ് വാഗ്ദാനം ചെയ്യുന്നത്. 10,000 രൂപയുടെ ഏറ്റവും കുറഞ്ഞ ഉറപ്പുള്ള പ്രതിമാസ പെന്‍ഷന്‍ ലഭിക്കുന്നതിന് ഒരു യുപിഎസ് വരിക്കാരന്‍ 10 വര്‍ഷത്തെ സേവനം പൂര്‍ത്തിയാക്കണം.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
