അക്കൗണ്ടില് പണമില്ലാത്ത സമയം ഉണ്ടായിട്ടുണ്ടോ? ഇത്തരം സന്ദര്ഭങ്ങളില് ഉപയോക്താക്കള്ക്ക് യുപിഐ വഴി പണമടയ്ക്കാനും പിന്നീട് അത് തിരിച്ചടയ്ക്കാനും സഹായിക്കുന്ന സംവിധാനമാണ് യുപിഐ ക്രെഡിറ്റ് ലൈന്. യുപിഐ പ്ലാറ്റ്ഫോം വഴി ബാങ്കുകള് നല്കുന്ന ഇന്സ്റ്റന്റ് വായ്പാ സൗകര്യമാണിത്. ബാങ്കുകള് തങ്ങളുടെ യോഗ്യരായ ഉപഭോക്താക്കള്ക്ക് മുന്കൂട്ടി അനുവദിക്കുന്ന ഒരു വായ്പാ പരിധിയാണിത്.
സാധാരണ വ്യക്തിഗത വായ്പകളില് നിന്ന് വ്യത്യസ്തമായി, അനുവദിച്ച തുക മുഴുവനായി മുന്കൂറായി അക്കൗണ്ടിലേക്ക് ലഭിക്കില്ല. പകരം, ഉപഭോക്താവ് യുപിഐ വഴി പേയ്മെന്റ് നടത്തുമ്പോള് മാത്രമേ നിശ്ചിത പരിധിയില് നിന്ന് പണം പിന്വലിക്കപ്പെടുന്നുള്ളൂ. വായ്പാദാതാവിന്റെ നിബന്ധനകള്ക്കനുസൃതമായി പലിശരഹിത കാലയളവോ അല്ലെങ്കില് തിരിച്ചടവ് ഇഎംഐ ആക്കി മാറ്റാനോ ഉള്ള സൗകര്യങ്ങള് ഇതില് ലഭ്യമാണ്. റിസര്വ് ബാങ്ക് ഈ സേവനത്തെ മറ്റ് റീട്ടെയില് വായ്പകളെപ്പോലെ തന്നെയാണ് നിയന്ത്രിക്കുന്നത്. അതായത്, യുപിഐ ക്രെഡിറ്റ് ലൈനുകള് മറ്റ് പേഴ്സണല് ലോണുകള്ക്ക് സമാനമായ റിസ്ക് മാനേജ്മെന്റ് രീതികളും ഗവേണന്സ് ഫ്രെയിംവര്ക്കും പിന്തുടരുന്നു.
ഉപഭോക്താവിന്റെ വരുമാനം, തിരിച്ചടവ് ശേഷി, നിലവിലുള്ള ബാധ്യതകള്, മുന്കാല ക്രെഡിറ്റ് ഹിസ്റ്ററി എന്നിവ പരിശോധിച്ചാണ് ബാങ്കുകള് ഈ സൗകര്യം അനുവദിക്കുന്നത്. ഇതൊരു ഔദ്യോഗിക വായ്പാ സൗകര്യമായതിനാല്, ഓരോ ഇടപാടും തിരിച്ചടവ് രീതിയും ക്രെഡിറ്റ് ബ്യൂറോകളെ അറിയിക്കുന്നുണ്ട്. അതിനാല്, കൃത്യസമയത്തുള്ള തിരിച്ചടവ് പുതിയ നിക്ഷേപകര്ക്ക് നല്ലൊരു ക്രെഡിറ്റ് ഹിസ്റ്ററി ഉണ്ടാക്കാന് സഹായിക്കും. എന്നാല് തിരിച്ചടവ് വൈകുന്നത് സ്കോറിനെ ദോഷകരമായി ബാധിക്കും.
ചെറുകിട ഇടപാടുകള്ക്ക് ക്രെഡിറ്റ് കാര്ഡുകള്ക്ക് പൂരകമായ ഒരു സംവിധാനമായാണ് ഇതിനെ സാമ്പത്തിക വിദഗ്ദ്ധര് വിലയിരുത്തുന്നത്. ഈ സൗകര്യം ഉപയോഗിക്കുന്നതിന് മുന്പ് പലിശ എപ്പോള് മുതല് കണക്കാക്കുന്നു എന്നും മറ്റ് ചാര്ജുകള് ഉണ്ടോ എന്നും ഉപഭോക്താക്കള് പരിശോധിക്കേണ്ടതാണ്. തിരിച്ചടവ് ശേഷിക്കനുസരിച്ച് മാത്രമേ ഇത് ഉപയോഗിക്കാവൂ എന്ന് വിദഗ്ദ്ധര് നിര്ദേശിക്കുന്നു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
