കോവിഡ് വാക്സിൻ: വ്യാജ പ്രചരണങ്ങൾ അടങ്ങിയ വിഡിയോകൾ നിരോധിക്കുമെന്ന് യൂട്യൂബ് 

കോവിഡ് വാക്‌സിനുമായി ബന്ധപ്പെട്ട് വ്യാജ പ്രചരണങ്ങൾ പരത്തുന്ന വിഡിയോകൾ നിരോധിക്കുമെന്ന് യൂട്യൂബ്. വാക്‌സിൻ ജനങ്ങളെ കൊല്ലും, വന്ധ്യതയ്ക്ക് ഇടയാക്കും, കുത്തിവെപ്പിനൊപ്പം മനുഷ്യരിൽ മൈക്രോ ചിപ്പ് ഘടിപ്പിച്ചേക്കും തുടങ്ങിയ വ്യാജ പ്രചരണങ്ങൾ നടത്തുന്ന വിഡിയോകളും ലോകാരോഗ്യ സംഘടനയുടേയും പ്രാദേശിക അധികൃതരിൽ നിന്നുള്ള വിവരങ്ങൾക്ക് വിരുദ്ധമായ ഉള്ളടക്കങ്ങൾ അടങ്ങുന്നവയും നീക്കം ചെയ്യും. 

ചികിത്സ തേടുന്നതിൽ നിന്നും ജനങ്ങളെ പിന്തിരിപ്പിക്കുന്ന തരത്തിലുള്ള വിഡിയോകളും അംഗീകാരമില്ലാത്ത ചികിത്സാ രീതികൾ പ്രചരിപ്പിക്കുന്നവയും യൂട്യൂബ് നിരോധിക്കും. നിലവിൽ കോവിഡുമായി ബന്ധപ്പെട്ട് തെറ്റിദ്ധാരണ പരത്തുന്ന വിഡിയോകൾ യൂട്യൂബ് നീക്കം ചെയ്യുന്നുണ്ട്.