ന്യൂഡല്‍ഹി: മോട്ടോര്‍ വാഹന നിയമം ലംഘിക്കുന്നവര്‍ക്ക് വന്‍തുക പിഴയായി ചുമത്തുന്നതിനെതിരെയുളള പ്രതിഷേധം ശക്തമാകുകയാണ്. പലപ്പോഴും നിയമപാലകരും വാഹനയാത്രക്കാരും തമ്മിലുളള തര്‍ക്കങ്ങളിലേക്കാണ് ഇത് വഴിതെളിയിക്കുന്നത്. അതിനിടെ, മോട്ടോര്‍ വാഹനരംഗത്തെ നിയമലംഘനങ്ങളെ വാഹനഇന്‍ഷുറന്‍സ് പ്രീമിയവുമായി ബന്ധിപ്പിക്കാന്‍ ഒരുങ്ങുകയാണ് ഇന്‍ഷുറന്‍സ് റെഗുലേറ്ററി ഡവലപ്പ്‌മെന്റ് അതോറിറ്റി.
മോട്ടോര്‍ വാഹനരംഗത്തെ നിയമലംഘനങ്ങളെ വാഹനഇന്‍ഷുറന്‍സ് പ്രീമിയവുമായി ബന്ധിപ്പിക്കുന്നതിന്റെ സാധ്യത പരിശോധിക്കാന്‍ ഐആര്‍ഡിഎ ഒരു പ്രവര്‍ത്തക സമിതിക്ക് രൂപം നല്‍കി. പ്രവര്‍ത്തകസമിതി രണ്ടുമാസത്തിനകം റിപ്പോര്‍ട്ട് നല്‍കണമെന്ന് ഐആര്‍ഡിഎയുടെ ഉത്തരവില്‍ പറയുന്നു. ഇതിനാവശ്യമായ മികച്ച പദ്ധതി നിര്‍ദേശിക്കുന്നത് അടക്കമുളള ചുമതലകളാണ് പ്രവര്‍ത്തകസമിതിക്ക് നല്‍കിയിരിക്കുന്നത്. രാജ്യാന്തരതലത്തിലെ മികച്ച മാതൃകകള്‍ പരിശോധിച്ച് ആവശ്യമായ നിര്‍ദേശങ്ങള്‍ നല്‍കാനും പ്രവര്‍ത്തകസമിതിയോട് ഐആര്‍ഡിഎ ആവശ്യപ്പെട്ടിട്ടുണ്ട്.
മോട്ടോര്‍ വാഹന നിയമലംഘനങ്ങള്‍ക്ക് അനുസരിച്ച് പ്രീമിയം വര്‍ധിക്കുന്ന ഫോര്‍മുല രാജ്യതലസ്ഥാനമായ ഡല്‍ഹിയില്‍ പരീക്ഷണാടിസ്ഥാനത്തില്‍ ഇന്‍ഷുറന്‍സ് കമ്പനികള്‍ നടപ്പിലാക്കണമെന്നും സെപ്റ്റംബര്‍ ആറിന് ഐആര്‍ഡിഎ പുറത്തിറക്കിയ ഉത്തരവില്‍ പറയുന്നു. മോട്ടോര്‍വാഹന നിയമലംഘനങ്ങള്‍ക്ക് അനുസരിച്ച് പ്രീമിയം വര്‍ധിക്കുന്ന ഫോര്‍മുല യാഥാര്‍ത്ഥ്യമായാല്‍ വാഹനയാത്രക്കാര്‍ക്ക് ഇരട്ടി പ്രഹരമാകുമെന്നാണ് റിപ്പോര്‍ട്ടുകള്‍. നിലവില്‍ തന്നെ മോട്ടോര്‍ വാഹന നിയമലംഘനങ്ങള്‍ക്കുളള പിഴ വന്‍തോതിലാണ് ഉയര്‍ത്തിയിരിക്കുന്നത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
