കൊച്ചി: ലോക്ക്ഡൗണിലെ സാമ്പത്തിക പ്രതിസന്ധിയിലും സ്വർണത്തിന്റെ വില കുതിച്ചുയരുന്നു. സ്വർണ വില ഇന്ന് 400 രൂപ വർധിച്ചു. ഇതോടെ പവന് 34,800 രൂപ ആയി ഉയർന്നു. ഗ്രാമിന് 4,350 രൂപയായി. 34,400 രൂപയായിരുന്നു ഒരു പവന് ഇന്നലത്തെ വില.
അതേസമയം സംസ്ഥാനത്ത് ചെറിയ സ്വർണക്കടകൾ തുറന്നെങ്കിലും വാങ്ങാനെത്തുന്നവരുടെ എണ്ണം കുറവാണെന്ന് ജ്വല്ലറി ഉടമകൾ പറയുന്നത്. സ്വർണത്തിന്റെ ഉയർന്ന വിലയും സാമ്പത്തിക പ്രതിസന്ധിയുമാണ് ഉപഭോക്താക്കളെ അകറ്റുന്നതെന്നും ജ്വല്ലറി ഉടമകൾ പറയുന്നു.
ഇതിനു മുമ്പ് മെയ് എട്ടിനാണ് സ്വർണത്തിന് ചരിത്രത്തിലെ ഏറ്റവും ഉയർന്ന നിരക്ക് രേഖപ്പെടുത്തിയത്. ഗ്രാമിന് 4,260 രൂപയും പവന് 34,080 രൂപയുമായിരുന്നു വില. മെയ് ഒന്നിലെ വിലയായ 33,400 രൂപയിൽ നിന്ന് 15 ദിവസം കൊണ്ട് 1000 രൂപയാണ് വർധിച്ചത്. ദേശീയ വിപണിയിൽ ഇത് തുടർച്ചയായി നാലാമത്തെ ദിവസമാണ് സ്വർണ വില കൂടുന്നത്.
അന്താരാഷ്ട്ര വിപണിയിൽ ഇപ്പോഴും സ്വർണത്തിന് 1,700 ഡോളറിന് മുകളിലാണ് നിരക്ക്. കേന്ദ്ര ബാങ്കുകളും സർക്കാരുകളും സാമ്പത്തിക ഉത്തേജക പാക്കേജുകൾ പ്രഖ്യാപിക്കുമെന്ന പ്രതീക്ഷയാണ് സ്വർണ വില കുതിക്കാനിടയാക്കിയത്. 2021-ഓടെ ഔൺസിന് 3,000 ഡോളർ വരെ വില എത്തിയേക്കും എന്ന് റിപ്പോർട്ടുകൾ ഉണ്ട്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
