വിജയ ബാങ്കും ദേനാ ബാങ്കും ഇനിയില്ല, ബാങ്ക് ഒഫ് ബറോഡയില്‍ ലയനം പ്രാബല്യത്തില്‍

തിരുവനന്തപുരം: ബാങ്ക് ഓഫ് ബറോഡ, ദേനാ ബാങ്ക്, വിജയ ബാങ്ക് ലയനം പ്രാബല്യത്തില്‍. ദേനാ ബാങ്കും വിജയ ബാങ്കും ബാങ്ക് ഒഫ് ബറോഡയില്‍ ലയിച്ചതോടെ ഇനി ആദ്യ രണ്ടു ബാങ്കുകളും ഉണ്ടാവില്ല.

ബംഗളൂരു ആസ്ഥാനമായ വിജയ ബാങ്കും മുംബൈ ആസ്ഥാനമായ ദേനാ ബാങ്കും വഡോദര ആസ്ഥാനമായ ബാങ്ക് ഓഫ് ബറോഡയിലാണ് ലയിക്കുന്നത്. ലയനത്തോടെ രാജ്യത്തെ മൂന്നാമത്തെ ഏറ്റവും വലിയ ബാങ്കായി ബാങ്ക് ഓഫ് ബറോഡ മാറി. 

ലയനം പ്രാബല്യത്തിലായെങ്കിലും മൂന്ന് ബാങ്കുകളും ഒരുമിച്ചാവാന്‍ ആറ് മാസം സമയമെടുക്കുമെന്നാണ് കരുതുന്നത്. കാലതാമസത്തിനുളള പ്രധാന കാരണം ടെക്‌നോളജി ഏകീകരണമാണ്. 

പുതിയ ബാങ്കിന് 9,500 ശാഖകളുണ്ടാകും, ലയനത്തോടെ ബാങ്ക് ജീവനക്കാരുടെ എണ്ണം 85,000 ത്തിന് മുകളിലാകും. ഇന്‍ഷുറന്‍സ് പോലെയുളള അനുബന്ധ ഉല്‍പ്പന്നങ്ങളില്‍ ഏകീകരണം ഉടനുണ്ടാകില്ല.