സി ഡി എസ്സിൽ പി എച്ച് ഡിക്കും ലോ അക്കാദമിയിൽ പഞ്ചവത്സര ഇ​ന്റ​ഗ്രേറ്റഡ് എൽ എൽ ബിക്കും അപേക്ഷിക്കാം

കേരളത്തിലെ പ്രമുഖ സാമൂഹികശാസ്ത്ര ​ഗവേഷണ സ്ഥാപനമായ തിരുവനന്തപുരം സെ​ന്റർ ഫോർ ഡെവലപ്മെ​ന്റ് സ്റ്റഡീസിൽ ( സി ഡി എസ്) അപ്ലൈഡ് ഇക്കണോമിസിൽ എം എയും ഇക്കണോമിക്സിൽ പി എച്ച് ഡിക്കും ഇപ്പോൾ അപേക്ഷിക്കാം. സംസ്ഥാന സർക്കാരി​ന്റെയും ഇന്ത്യൻ കൗൺസിൽ ഓഫ് സോഷ്യൽ സയൻസ് റിസർച്ചി​ന്റെയും പിന്തുണയോടെ പ്രവർത്തിക്കുന്ന സി ഡി എസ്, ജവഹർലാൽ നെഹ്രു സർവകലാശാലയുടെ ബിരുദമാകും നൽകുക. ലോ അക്കാദമിയിൽ പഞ്ചവത്സര എൽ എൽ ബി കോഴ്സുകൾക്കും ഇപ്പോൾ അപേക്ഷിക്കാം.

എം എ അപ്ലൈഡ് ഇക്കണോമിക്സ്

സി ഡി എസ്സിൽ, പട്ടികജാതി, പട്ടികവർ​ഗ വിഭാ​ഗത്തിൽപ്പെട്ടവർക്കായുള്ള സ്പെഷ്യൽ ഡ്രൈവിലാണ് എം എ ഇക്കണോമിക്സിൽ അപേക്ഷ ക്ഷണിച്ചിട്ടുള്ളത്. പ്രോസ്‌പെക്ടസ് അനുസരിച്ച് മിനിമം യോഗ്യതാ മാനദണ്ഡങ്ങൾ ഉള്ളവരും സാമ്പത്തിക ശാസ്ത്രം/വികസനം, തൊഴിൽ പഠനം/സാമൂഹിക ശാസ്ത്രം/മാനേജ്‌മെന്റ്/കൊമേഴ്‌സ് എന്നീ വിഷയങ്ങളിലേതിലെങ്കിലും സിയുഇടി ( CUET) യിൽ യോഗ്യത നേടിയവരുമായവർക്ക് അപേക്ഷിക്കാം. ഷോട്ട്‌ലിസ്റ്റ് ചെയ്തവരുമായുള്ള വ്യക്തിഗത അഭിമുഖത്തിലെ സ്കോ‍ർ കൂടി പരി​ഗണിച്ചായിരിക്കും പ്രവേശനം.

സി ഡി എസ്സി​ന്റെ വെബ്സൈറ്റിൽ നിന്ന് അപേക്ഷ ഫോം പ്രിന്റൗട്ട് എടുത്ത് പൂരിപ്പിച്ച് അപേക്ഷാ ഫോമും പ്രസക്തമായ പരീക്ഷാ സ്കോർ കാർഡും ഉൾപ്പടെ സ്കാൻ ചെയ്ത് admissionma@cds.edu എന്ന വിലാസത്തിൽ ഇമെയിൽ ചെയ്യണം. മറ്റ് സർട്ടിഫിക്കറ്റുകളുടെ പകർപ്പുകൾ അറ്റാച്ചുചെയ്യേണ്ടതില്ല. അപേക്ഷാ ഫീസ് ഇല്ല. ഓ​ഗസ്റ്റ് 20 ആണ് അവസാന തീയതി.

വിശദവിവരങ്ങൾക്ക്: https://cds.edu/event/ma-admission-special-drive/

പി എച്ച് ഡി

സി ഡി എസ്സിൽ ഒക്ടോബറിൽ ആരംഭിക്കുന്ന ​ഗവേഷണ ബിരുദ പഠനത്തിന് സി ഡി എസിൽ ഇപ്പോൾ അപേക്ഷിക്കാം. 12 പേർക്കാണ് പി എച്ച് ഡിക്ക് പ്രവേശനം ലഭിക്കുക. ഓൺലൈനായി വേണം അപേക്ഷിക്കാൻ. അപേക്ഷിക്കേണ്ട അവസാന തീയതി ഓ​ഗസ്റ്റ് 25 ആണ്. നിയമാനുസൃതമായ സംവരണ മാനദണ്ഡങ്ങൾ പാലിച്ചായിരിക്കും പ്രവേശനം. പൊതുവിഭാ​ഗത്തിന് 500 രൂപ അപേക്ഷാ ഫീസ് ഉണ്ട്. എസ് സി, എസ് ടി, ഭിന്നശേഷി വിഭാ​ഗത്തിൽപ്പെട്ടവർക്ക് അപേക്ഷാഫീസ് ഇല്ല.

പ്രോസ്‌പെക്ടസിൽ സൂചിപ്പിച്ചിരിക്കുന്നതുപോലെ വിദ്യാഭ്യാസ യോഗ്യതകളുടെ അടിസ്ഥാനത്തിൽ അപേക്ഷകർക്ക് കുറഞ്ഞ യോഗ്യത ഉണ്ടായിരിക്കണം കൂടാതെ നെറ്റ് യോഗ്യത നേടിയിരിക്കണം .അതായത്, ജെആർഎഫ് യോഗ്യതയുള്ളവർ ,ജെ.ആർ.എഫ് ഇല്ലാതെ അസിസ്റ്റ​ന്റ് പ്രൊഫസർഷിപ്പിന് യോഗ്യത നേടിയവ‍ർ,ജെ.ആർ.എഫിനോ അസിസ്റ്റന്റ് പ്രൊഫസർഷിപ്പിനോ യോഗ്യത നേടിയിട്ടില്ലാത്തവരും എന്നാൽ പി.എച്ച്.ഡി പ്രവേശനത്തിന് മാത്രം യോഗ്യത നേടിയവരും ഉൾപ്പടെയുള്ളയവർക്ക് അപേക്ഷിക്കാം.

വിശദവിവരങ്ങൾക്ക്: https://cds.edu/wp-content/uploads/Advt-PhD2025.pdf

പഞ്ചവത്സര എൽഎൽ ബി

തിരുവനന്തപുരം ലോ അക്കാദമിയിൽ ബി എസ് സി ( ഐടി)എൽഎൽ ബി,ബി ബി എ എൽ എൽ ബി എന്നീ പഞ്ചവത്സര കോഴ്സുകളിലേക്ക് ഇപ്പോൾ അപേക്ഷിക്കാം. ഓ​ഗസ്റ്റ് 25 ആണ് അപേക്ഷ ലഭിക്കേണ്ട അവസാന തീയതി. വിശദ വിവരങ്ങൾക്ക്: https://keralalawacademy.in/admission/

യു ജി സി നെറ്റ്- ജെ ആർ എഫ് പരീക്ഷാ പരിശീലനം

കോട്ടയം മഹാത്മാ​ഗാന്ധി യൂണിവേഴ്സിറ്റി എംപ്ലോയ്മെ​ന്റ് ഇൻഫർമേഷൻ ആൻ്ഡ ​ഗൈഡൻസ് ബ്യൂറോ മാനവിക വിഷയങ്ങളിലെ യു ജി സി നെറ്റ് ജെ ആർ എഫ് പരീക്ഷകളുടെ ജനറൽ പേപ്പറിന് സൗജന്യ പരിശീലനം നടത്തുന്നു. താൽപ്പര്യമുള്ളവർക്ക് ഇപ്പോൾ അപേക്ഷിക്കാം. വിശദവിവരങ്ങൾക്ക്: ഫോൺ 0481-2731025,9495628626