രാത്രി മുതൽ ആരോ​ഗ്യം മോശം, എന്നിട്ടും പുനീത് രാവിലെ ജിമ്മിലെത്തി; നെഞ്ചുവേദനയുണ്ടായത് വർക്കൗട്ടിനിടെ 

കന്നഡ സൂപ്പർതാരം പുനീത് രാജ്കുമാറിന്റെ അപ്രതീക്ഷത വിയോ​ഗത്തിന്റെ ഞെട്ടലിലാണ് ഇന്ത്യൻ സിനിമാലോകം. വ്യായാമത്തിന് അത്രയേറെ പ്രാധാന്യം നൽകിയിരുന്ന ഒരു വ്യക്തി തന്റെ ജീവിതത്തിലെ അവസാന മണിക്കൂറുകൾ ചിലവഴിച്ചതും ജിമ്മിലാണ്. രാവിലെ ജിമ്മിൽ വർക്കൗട്ട് ചെയ്തു കൊണ്ടിരിക്കുന്നതിനിടെ നെഞ്ചുവേദന അനുഭവപ്പെട്ടതിനെത്തുടർന്നാണ് നടനെ ആശുപത്രിയിലെത്തിച്ചത്. 

ഒരിക്കലും വ്യായാമം മുടക്കാൻ ആഗ്രഹിക്കാത്ത വ്യക്തിയായിരുന്നു പുനീത്. വീട്ടിലാണെങ്കിലും യാത്രയിലാണെങ്കിലും ഷൂട്ടിങ്ങിലാണെങ്കിലുമെല്ലാം വ്യായാമത്തിൽ മാറ്റമില്ല. കോവിഡ് വ്യാപനത്തെത്തുടർന്ന് ലോക്ഡൗൺ ഏർപ്പെടുത്തിയപ്പോൾ വീട്ടിൽ തന്നെ ജിം ഒരുക്കിയായിരുന്നു താരത്തിന്റെ വർക്കൗട്ട്. 

ആയോധന കലകളിൽ പ്രാവീണ്യമുള്ളയാളാണ് പുനീത്. അദ്ദേഹത്തിന്റെ ആരോഗ്യവും ശരീരഘടനയും മികച്ചതായിരുന്നു. എപ്പോഴും ഉത്സാഹത്തോടെയിരിക്കുന്ന വ്യക്തി. പതിവ് വ്യായാമ ശൈലിതന്നെയാണ് ഇതിന്റെ കാരണവും. പിനീത് വ്യായാമം ചെയ്യുന്ന ചിത്രങ്ങൾ ഇപ്പോൾ സോഷ്യൽ മീഡിയയിൽ വൈറലാവുകയാണ്. 

ഇന്നലെ രാത്രി മുതൽ പിനീതിന്റെ ആരോഗ്യം മോശമായിരുന്നു. എന്നിട്ടും രാവിലെ ജിമ്മിലെത്തി പതിവുപോലെ വർക്കൗട്ട് ചെയ്തു. ഇതോടെ അനാരോഗ്യമുള്ളപ്പോൾ വ്യായാമം ചെയ്യുന്നത് ഉചിതമാണോ എന്ന ചോദ്യം വീണ്ടും ഉയരുകയാണ്.