നൃത്തസംവിധായകൻ ഗണേഷ് ആചാര്യയ്‌ക്കെതിരേ ലൈംഗികാതിക്രമ പരാതി; അശ്ലീല വിഡിയോ കാണാൻ നിർബന്ധിച്ചെന്നും യുവതി 

മുംബൈ: പ്രമുഖ നൃത്തസംവിധായകൻ ഗണേഷ് ആചാര്യയ്‌ക്കെതിരേ ലൈംഗികാതിക്രമ പരാതിയിൽ കുറ്റപത്രം സമർപ്പിച്ചു. മുപ്പത്തി മൂന്നുകാരിയായ സഹപ്രവർത്തകയാണ് പരാതി നൽകിയത്. മഹാരാഷ്ട്ര വനിതാ കമ്മീഷനിലും യുവതി പരാതി നൽകിയിരുന്നു. 

2020 ‌ജനുവരിയിലാണ് യുവതി ഗണേഷ് ആചാര്യയ്‌ക്കെതിരേ ആരോപണവുമായി രം​ഗത്തെത്തിയത്. നൃത്ത രം​ഗത്ത് വിജയിക്കണമെങ്കിൽ താനുമായി ലൈംഗിക ബന്ധത്തിൽ ഏർപ്പെടണമെന്ന് ഗണേഷ് ആവശ്യപ്പെട്ടെന്നും വിസമ്മതിച്ചതിന്റെ ഫലമായി ഇന്ത്യൻ ഫിലിം ആൻഡ് ടെലിവിഷൻ കൊറിയോഗ്രാഫേഴ്‌സ് അസോസിയേഷനിൽ നിന്നും അം​ഗത്വം നഷ്ടപ്പെട്ടെന്നും യുവതി പരാതിയിൽ പറയുന്നു. ഇതു കൂടാതെ അശ്ലീല വിഡിയോകൾ കാണാൻ നിർബന്ധിച്ചെന്നും യുവതി ആരോപിച്ചു. മുംബൈ ഓഷിവാര പൊലീസാണ് കേസിൽ അന്വേഷണം പൂർത്തിയാക്കി കുറ്റപത്രം സമർപ്പിച്ചത് . 

ഗണേഷ് ആചാര്യയ്ക്ക് എതിരെ ഇന്ത്യൻ ശിക്ഷാനിയമത്തിലെ 354-എ, 354-സി, 354-ഡി, 509, 323, 504, 34 തുടങ്ങിയ വകുപ്പുകൾ പ്രകാരമാണ് കേസെടുത്തിരിക്കുന്നത്. മെട്രോപോളിറ്റൻ മജിസ്‌ട്രേറ്റ് കോടതിയിലാണ് കുറ്റപത്രം സമർപ്പിച്ചിരിക്കുന്നത്. കേസിൽ ഗണേഷിന്റെ അസിസ്റ്റന്റിനെയും പ്രതിചേർത്തിട്ടുണ്ട്. ഇതാദ്യമായല്ല ഗണേഷ് ആചാര്യക്കെതിരെ പീഡനപരാതി ഉയരുന്നത്. നാനാ പടേക്കറിനൊപ്പം ഗണേഷ് ആചാര്യയ്‌ക്കെതിരെ നടി തനുശ്രീ ദത്ത പരാതി നൽകിയിരുന്നു.