ലച്ചുവിന്റെ കയ്യിലിരിക്കുന്ന മാത്തു എന്നെ അപ്പൂപ്പാന്ന് വിളിക്കുന്നതും കാത്ത്; മകൾക്ക് പിറന്നാൾ ആശംസകളുമായി ലാൽ ജോസ്

അടുത്തിടെയാണ് സംവിധായകൻ ലാൽ ജോസ് മകൾക്ക് കുഞ്ഞ് പിറന്ന വിവരം ആരാധകരെ അറിയിച്ചത്. ഇപ്പോൾ മകൾക്ക് പിറന്നാൾ ആശംസകൾ നേർന്നുകൊണ്ട് അദ്ദേഹം കുറിച്ച വാക്കുകളാണ് വൈറലാവുന്നത്. കൊച്ചുമകൻ മാത്തു അപ്പൂപ്പാ എന്നു വിളിക്കുന്നതു കേൾക്കാനായി കാത്തിരിക്കുകയാണ് എന്നാണ് ലാൽ ജോസ് കുറിച്ചത്. നിന്നിലൂടെയാണ് ആത്മഹർഷങ്ങൾ താൻ അറിഞ്ഞതെന്നും മകളോട് അദ്ദേഹം പറയുന്നുണ്ട്. 

കുട്ടിയായിരുന്ന സമയത്ത് മകളേയും പിടിച്ചു നിൽക്കുന്ന ഭാര്യയുടേയും മകനെ പിടിച്ചു നിൽക്കുന്ന മകളുടേയും ചിത്രങ്ങൾക്കൊപ്പമാണ് ലാൽ ജോസിന്റെ കുറിപ്പ്. 'ലീനേടെ കയ്യിലിരിക്കുന്ന ഈ കൈക്കുഞ്ഞ് ലച്ചുവാണ് - എന്നെ ആദ്യം അപ്പാന്ന് വിളിച്ചവൾ. ദാ ഇപ്പോ അവൾടെ കയ്യിലിരിക്കുന്ന മാത്തു എന്നെ അപ്പൂപ്പാന്ന് വിളിക്കുന്നതും കാത്ത് ഞാൻ. ലച്ചു നിന്നിലൂടെ ഞാനറിഞ്ഞ ആത്മഹർഷങ്ങൾ മനസ് നിറഞ്ഞ പിറന്നാൾ ആശംസ’.- ലാൽ ജോസ് കുറിച്ചു. പപ്പയുടെ ആശംസക​ൾക്ക് നന്ദി പറഞ്ഞുകൊണ്ടു ഐറിനും കമന്റ് ചെയ്തിട്ടുണ്ട്.

ലാൽ ജോസിന് രണ്ട് പെൺമക്കളാണ്. ഐറിൻ, കാതറീൻ. ഇതിൽ ഐറിന്റെ മകനാണ് മാത്യു.  തന്റെ മുപ്പതാം വിവാഹവാർഷികത്തിലാണ് കൊച്ചുമകൻ പിറന്ന സന്തോഷം ലാൽ ജോസ് പങ്കുവച്ചത്. ഭാര്യ ലീനയ്ക്കും മാത്തുവിനുമൊപ്പമുള്ള ചിത്രവും അദ്ദേഹം പങ്കുവച്ചിരുന്നു. ‘എടാ മാത്തൂ ... അപ്പുവിന്റെയും അമ്മുവിന്റേയും ദാമ്പത്യത്തിന് ഇന്ന് മുപ്പതിന്റെ മൂപ്പെത്തുന്നു. ഇക്കുറി ഞങ്ങൾക്ക് കിട്ടിയ വലിയ സമ്മാനം നീയാണ്...’ ലാൽ ജോസ് കുറിച്ചു.